Sangli : मराठा समाजाला कुणबी प्रमाणपत्र देण्याची घोषणा मुख्यमंत्री एकनाथ शिंदेंनी काल मंत्रिमंडळाच्या बैठकीनंतर केली. त्यावर काँग्रेसचे नेते, माजी मंत्री विश्वजित कदम यांनी भाष्य केले आहे. मराठा आंदोलकांवर करण्यात आलेल्या लाठीहल्ल्याची चूक अंगलट येणार असल्याचे लक्षात आल्याने राज्य सरकारने कुणबी प्रमाणपत्र देण्याची किरकोळ घोषणा केल्याची टीका काँग्रेसचे माजी मंत्री विश्वजित कदम यांनी केली आहे.
"निजामशाहीतील दाखले तपासून कुणबी प्रमाणपत्र देण्याचे राज्य सरकारने जाहीर केले आहे. मात्र जातीचे पुरावे शोधण्यासाठी आधीच ओबीसी समाजाला मोठा त्रास सहन करावा लागतो. त्यामुळे त्याची अंमलबजावणी कशी होते, हे पाहवे लागेल. मुख्यमंत्री एकनाथ शिंदे यांनी कोणत्या हेतूने हे जाहीर केले ? हे देखील बघावे लागेल," असे कदम यांनी सांगितले.
मुख्यमंत्री एकनाथ शिंदे यांच्या निर्णयावर राष्ट्रवादी काँग्रेसचे आमदार रोहित पवार, भाजप नेत्या पंकजा मुंडे यांनी नाराजी व्यक्त केली आहे. जालन्यात सुरू असलेल्या मराठा आंदोलनावर उपोषणकर्ते मनोज जरांगे ठाम आहेत. "वंशावळी" हा शब्द काढा मगच उपोषण मागे घेतो, सरसकट आरक्षण द्या, असे सांगत मनोज जरांगे यांनी निर्णयात सुधारणा करण्याचे सरकारला सुचवले.
"कोणीतरी घोषणा करून आरक्षण मिळणार नाही. कायदेशीर मार्गाने आरक्षण द्यावे लागेल," अशा शब्दांत पंकजा मुंडे यांनी मुख्यमंत्र्यांना टोला लगावला आहे."मराठा समाजाला आरक्षण मिळाले पाहिजे, यासाठी अभ्यास गट स्थापन करून योग्य तो आकडा ठरवला पाहिजे," असे मतदेखील पंकजा मुंडे यांनी व्यक्त केले आहे.
Edited By : Mangesh Mahale
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.