Video Manoj Jarange Patil: 'ठरवलं असतं तर धाराशिव बाहेर जाऊ दिलं नसतं', मनोज जरांगेंचा राज ठाकरेंना इशारा

Manoj Jarange Patil : मनसे प्रमुख राज ठाकरे यांनी महाराष्ट्रात आरक्षणाची गरज नसल्याचे म्हटले होते. त्यांच्या या वक्तव्यानंतर मराठा तरुण संतप्त झाले होते. राज ठाकरे धाराशिवला आले होते तेव्हा मराठा आंदोलक ठाकरे मुक्कामी असलेल्या हाॅटेलमध्ये शिरले होते. या आंदोलकांशी चर्चा करताना राज ठाकरे आपल्या वक्तव्यावर ठाम होते. मात्र, राज ठाकरेंच्या विरोधात झालेल्या आंदोलनावर मनोज जरांगे-पाटील यांनी मोठी प्रतिक्रिया दिली आहे.

'मी जर मनात आणलं असतं. मी येड्या दिमागाचा असतो तर म्हणालो असतो यांना धाराशिवच्या बाहेर जाऊ देऊ नका', या शब्दांत मनोज जरांगे पाटील यांनी राज ठाकरे यांना इशारा दिला.

मनोज जरांगे पाटील यांनी सोलापूरमधील आपल्या रॅलीत सत्ताधाऱ्यासंह विरोधपक्षांवर देखील टीका केली. नारायण राणे हे जरांगे पाटील यांच्यावर टीका करत आहेत. त्याला उद्देशून जरांगे पाटील म्हणाले, माझ्या नादी लागू नका. याच्यानंतर बोलला तर धुलाई करेल.तसेच छगन भुजबळ यांच्या प्रचाराला येणाऱ्या नेत्यांना देखील पाडा, असे आवाहन देखील मनोज जरांगे पाटील यांनी केले.

काय म्हणाले होते राज ठाकरे?

आपल्याकडे किती नोकऱ्या उपलब्ध आहेत, हे आपल्या मुलांना माहिती नाही. नोकऱ्या महाराष्ट्रात असतात आणि जाहिराती उत्तर प्रदेश, बिहारमध्ये प्रसिद्ध केल्या जातात. विधानसभेची निवडणूक झाल्यानंतर तुम्हाला सर्व अंदाज येईल. जरांगे-पाटलांनाही सर्व अंदाज येतील. महाराष्ट्राला आरक्षणाची गरज नाही. महाराष्ट्रासारखं प्रगत राज्य आहे. इथल्या मुलांना शिक्षण आणि रोजगार याच्यासारख्या संधी कोठेच उपलब्ध होणार नाहीत. महाराष्ट्रात सर्वकाही आहे.

'तो' आरोप फेटाळला

शरद पवार हे मराठा समाजाचा माथ भडकवत असल्याचा आरोप राज ठाकरे यांनी केला होता. त्याला मनोज जरांगे पाटील यांनी प्रत्युत्तर दिले. शरद पवार मराठ्यांचे माथे भडकवितात का नाही मला माहीत नाही. कोणाच्या ऐकण्यातला हा समाज नाही. आम्ही आरक्षण घेऊनच राहणार. यांना दंगल घडवायची आम्ही ते होऊ देणार नाही, अशा शब्दात राज ठाकरेंना सुनावले आहे.