जयंत पाटलांच्या अजितदादा, वळसे पाटलांसह हसन मुश्रीफांना कानपिचक्या!

सांगली : राज्यातील काही जिल्ह्यांत मंत्री जिल्हा सहकारी बॅंकेच्या संचालक मंडळामध्ये स्वःताची वर्णी लावून घेत आहेत. हे चुकीचे आहे. त्यांनी आपल्या विश्वास कार्यकर्त्यांना संधी देण्याची गरज आहे, अशा शब्दांत राष्ट्रवादी काँग्रेसचे प्रदेशाध्यक्ष जयंत पाटील (jayant patil) यांनी जिल्हा बॅंकेवर संचालक झालेल्या मंत्र्यांना कानपिचक्या दिल्या. (minister to become director in a district co-operative bank is wrong : Jayant Patil)

जयंत पाटील यांचा बोलण्याचा रोख नेमका कुणाकडे, अशी चर्चा कार्यक्रमस्थळी रंगली होती. कारण, पुणे जिल्हा सहकारी बॅंकेवर खुद्द उपमुख्यमंत्री अजित पवार (ajit pawar), गृहमंत्री दिलीप वळसे (dilip walse patil), राज्यमंत्री दत्तात्रेय भरणे (Dattatray Bharane), तर कोल्हापूर जिल्हा बॅंकेवर हसन मुश्रीफ (hasan mushrif) हे राष्ट्रवादीचे मंत्री संचालक आहेत. त्यामुळे जयंतरावांनी कोणावर निशाणा साधला, अशी चर्चा कार्यक्रमानंतर सुरू झाली आहे.

सांगली जिल्हा मध्यवर्ती सहकारी बँकेच्या कार्यालयात (स्व.) गुलाबराव पाटील पुरस्कारांचे वितरण जलसंपदा मंत्री जयंत पाटील यांच्या हस्ते करण्यात आले. त्यावेळी त्यांनी ही टोलेबाजी केली. या वेळी कृषी राज्यमंत्री डॉ. विश्वजीत कदम उपस्थित होते.

राष्ट्रवादीचे प्रदेशाध्यक्ष पाटील म्हणाले की, ‘‘आमच्या पक्षाचे चिन्ह घड्याळ असले तरी माझे आणि घड्याळाचे कधीच जमले नाही. कार्यक्रमाला यायला मला नेहमीच उशीर होत असतो. धनुष्यबाण आणि हाताच्या नादाला लागून आता तर घड्याळ्याची वेळही चुकू लागली आहे. अतिवृष्टी, अवकाळी पाऊस यांसारख्या संकटाला डाळिंब, द्राक्ष उत्पादक शेतकऱ्यांना सामोरे जावे लागते. पीक विमा कंपन्यांचे निकष आणि झालेले नुकसान यामध्ये मेळ बसत नाही, त्यामुळे बागायतदार मदतीपासून वंचित राहतात, त्यामुळे द्राक्ष उत्पादकांची अवस्था पाहून त्यांना कर्जवसुलीत सांगली जिल्हा बँकेने सवलत द्यावी. कर्जवसुलीत हप्ते पाडून मुदतवाढ द्यावी.’’  

गुलाबराव पाटील यांनी नैतिकता, स्वच्छ चारित्र्य या बळावर नेहमी राजकारण, समाजकारण केले. लोक नेहमीच चांगले काम केलेल्या माणसाची दीर्घकाळ पूजा करतात. त्याप्रमाणेच गुलाबराव पाटील हे मनाने उमदे, निस्पृह होते. सहकारात त्यांनी केलेल्या कामामुळे त्यांच्याबद्दल आजही राज्यभरात आदर आहे, असेही जयंत पाटील यांनी नमूद केले.