निलेश राणेंचं नाव घेताच जयंत पाटील म्हणाले, अशांवर मी बोलत नाही!

मुंबई : देशातील चार राज्यांतील विधानसभा निवडणुकीत भाजपला (BJP) यश मिळाल्यानंतर महाराष्ट्रातील पक्षाच्या नेत्यांचा आत्मविश्वास दुणावला आहे. महाराष्ट्रात 2024 च्या विधानसभा निवडणुकीतही बहुमताने सत्तेत येऊ, असा असा दावा करीत आहेत. यावरून राजकीय शिमगा सुरू झाला आहे. भाजप नेते व माजी खासदार निलेश राणे यांनी यावरून राष्ट्रवादी काँग्रेसचे (NCP) अध्यक्ष शरद पवार यांच्यावर निशाणा साधला होता. यावर राष्ट्रवादीचे प्रदेशाध्यक्ष जयंत पाटील यांनी टोमणा मारला आहे.

भाजप नेत्यांच्या दाव्यावर जयंत पाटील (Jayant Patil) यांनी टोला लगावला. आम्हाला 2024 पर्यंत त्यांनी मुदतवाढ दिलेली आहे. त्यामुळे त्यांचे मनापासून धन्यवाद, असे पाटील म्हणाले. निलेश राणे (Nilesh Rane) यांनी शरद पवारांवर (Sharad Pawar) केलेल्या टीकेबाबत विचारणा केली असता जयंत पाटील म्हणाले की, असल्या वक्तव्यावर आणि अशा व्यक्तींच्यावर मी कधीही काही बोलत नाही. लोक समजून जातात कुणाची काय हे आहे ते.

आगामी विधानसभा निवडणुकीत महाराष्ट्रात बहुमताने सत्तेत येऊ, असा दावा भाजपकडून केला जात आहे. याला शरद पवार यांनी उत्तर दिले होते. भाजपकडून होणाऱ्या आरोपांना घाबरू नका, मी भाजपला पुन्हा राज्यात येऊ देणार नाही, असे त्यांनी म्हटले होते. यानंतर निलेश राणेंनी ट्विट करीत याला उत्तर दिले होते. ते म्हणाले होते की, भाजपची सत्ता पवार साहेबांना कशी परवडेल, कारण त्यात दाऊदचा सहभाग नसेल. पवार साहेबांनी खरं जनमत घेतलं तर त्यांना कळेल त्यांच्या राजकारणाचा आता लोकांना कंटाळा आलाय. मोठी लॉटरी एकदाच लागते पवार साहेब नेहमी नाही.

शरद पवारांच्या या उत्तरावर भाजपनेही खुले आव्हान दिले आहे. भाजपने म्हटले आहे की, शरद पवारांनी भाजपची काळजी करु नये, स्वत:च्या पक्षाचे ६० च्या वर आमदार निवडून आणा. इतर प्रादेशिक पक्षांनी १० वर्षात दोन राज्यात सत्ता स्थापन केली आहे, तुम्ही अजून साडे तीन जिल्ह्यातच अडकलात. ५५ वर्षांच्या राजकीय कारकिर्दीत स्वतःच्या पक्षाचा मुख्यमंत्री बनवून दाखवा.