Sunetra Pawar : सुनेत्रा पवारांचा थेट जयकुमार गोरेंना फोन; राष्ट्रवादी सदस्यांच्या निधीच्या गाऱ्हाण्यांवर पालकमंत्र्यांचा उपमुख्यमंत्र्यांना 'हा' शब्द!

Solapur, 15 September : महायुतीमधील तीन पक्षांमध्ये निधी वाटपावरून अंतर्गत कुरुबुरी आहेत. मोठा भाऊ असलेल्या भाजपकडून दुजाभाव केला जात असल्याचा आरोप शिवसेना आणि राष्ट्रवादी काँग्रेस पक्षांकडून केला जात आहे. सोलापुरात पंधराव्या वित्त आयोगाच्या निधीत मनमानी होत असल्याची तक्रार पंढरपूर तालुक्यातील जिल्हा परिषद सदस्यांनी बारामती येथे जात उपमुख्यमंत्री सुनेत्रा पवार यांच्याकडे केली. कार्यकर्त्यांची तक्रार ऐकताच उपमुख्यमंत्री पवार यांनी थेट सोलापूरचे पालकमंत्री जयकुमार गोरे यांना फोन करत निधी वाटपात राष्ट्रवादीच्या सदस्यांवर अन्याय होऊ नये. सर्वांना समसमान निधी मिळावा, अशी सूचना केली.

पंढरपूर तालुक्यातील जिल्हा परिषद सदस्या मयुरी बागल, गीतांजली साळुंखे, शन्मुखी कोरके, सुप्रिया गायकवाड यांच्यासह प्रमुख नेत्यांनी नुकतीच उपमुख्यमंत्री सुनेत्रा पवार यांची भेट घेत त्यांच्याकडे सोलापुरात निधीवाटपावरून होत असलेल्या अन्यायाबाबत तक्रारीचा पाढा वाचला.

पालकमंत्री जयकुमार गोरे यांनी उपमुख्यमंत्री सुनेत्रा पवार यांच्यासमोर समसमान निधी वाटपाचा शब्द दिला आहे. त्यानुसार येत्या दोन ते चार दिवसांत निधी वाटप होईल, अशी अपेक्षा राष्ट्रवादी काँग्रेसच्या सदस्यांनी बोलून दाखली.

विधान परिषदेच्या निवडणुकीत महायुतीचा धर्म पाळून भाजप उमेदवाराला मदत करूनही निधी वाटपामध्ये राष्ट्रवादी काँग्रेस पक्षाच्या सदस्यांवर अन्याय केला जात आहे. पंधराव्या वित्त आयोगाच्या निधीतही दुजाभाव केला जात आहे. भाजपकडून मनमानी आणि पक्षपाती पद्धतीने निर्णय घेतले जात आहेत. भाजपचे पदाधिकारी स्वतः साठी अधिकचा निधी घेऊन इतर सदस्यांना तुटपुंजा निधी देत असल्याचे उपमुख्यमंत्री सुनेत्रा पवार यांना दाखवून देण्यात आले.

जिल्हा परिषद सदस्यांची तक्रार ऐकल्यानंतर उपमुख्यमंत्री सुनेत्रा पवार यांनी थेट सोलापूरचे पालकमंत्री तथा ग्रामविकास मंत्री जयकुमार गोरे यांना फोन केला. महायुतीमधील सर्व पक्षाच्या सदस्यांना समान निधी मिळाला पाहिजे. विधान परिषद निवडणुकीत खुद्द पालकमंत्री गोरे यांनी समसमान निधी वाटपाचा दिलेल्या आश्वासनाची आठवण करून देण्यात आली. भाजपप्रमाणे राष्ट्रवादी काँग्रेसच्या जिल्हा परिषद सदस्यांना विकास कामांसाठी निधी मिळायला हवा, अशी सूचना केला. त्यावर पालकमंत्री गोरे यांनी सकारात्मक प्रतिसाद दिला.

आम्हाला पालकमंत्र्यांकडून समान निधीची अपेक्षा : मयुरीताई बागल

निधी वाटपात कोणत्याही सदस्यांवर अन्याय होणार नाही. भाजपच्या सदस्यांप्रमाणे राष्ट्रवादी काँग्रेसच्या सदस्यांना समसमान निधीचे वाटप केले जाईल, असा शब्द गोरे यांनी उपमुख्यमंत्री पवार यांना दिला आहे, त्यानुसार निधीचे वाटप होण्याची आम्हाला अपेक्षा आहे, असे राष्ट्रवादीच्या जिल्हा परिषद सदस्या मयुरीताई बागल यांनी सांगितले.