Satara SP : माझ्या स्वागतासाठी बुके नको, पुस्तके आणा ; समीर शेख यांचा अनोखा उपक्रम!

Satara SP : जिल्ह्यात नुकतेच बदली होऊन आलेले सातारचे नवे पोलिस अधीक्षक समीर शेख आज (२२ ऑक्टो ) पदभार स्वीकारणार आहेत. पदग्रहणानंतर आपल्या स्वागतासाठी येणाऱ्या, भेटायला येणाऱ्या नागरिकांनी बुके ऐवजी गडचिरोली येथील युवकांसाठी स्पर्धा परीक्षेची पुस्तके आणावीत, असे आवाहन त्यांनी केले आहे.

सातारचे आधीचे पोलिस अधीक्षक अजय कुमार बन्सल यांच्या बदलीचे काल शासनाने आदेश दिले. बन्सल यांच्या जागी समीर शेख यांची नियुक्ती करण्यात आली आहे. ते गडचिरोली येथे अतिरिक्त पोलिस अधीक्षक म्हणून कार्यरत होते. नवीन अधीक्षकांनी पदभार स्वीकारल्यानंतर अनेक जण भेटायला येत असतात. त्या वेळी ते बुके आणत असतात; परंतु नागरिकांनी बुकेऐवजी नवीन आवृत्तीची पुस्तके भेट द्यावीत, असे त्यांनी म्हंंटले आहे.

शेख यांच्या आवाहनानंतर त्यांच्या या अनोख्या निर्णयाचे स्वागत आणि कौतुक होत आहे. दरम्यान बन्सल यांना बदलीचे आदेश प्राप्त झाले होते. गडचिरोलीचे अप्पर पोलीस अधीक्षक म्हणून कार्यरत असलेले समीर शेख यांची सातारा पोलीस अधीक्षक म्हणून बदली झाली आहे.

यापूर्वीही सहाय्यक पोलीस अधीक्षक म्हणून शेख यांनी धडक कामगिरी बजावली होती. पुन्हा एकदा साताऱ्याच्या होम ग्राउंड वर शेख यांची बदली झाली आहे. गडचिरोलीवरून पुन्हा समीर शेख हे साताऱ्यात एस. पी. म्हणून आले आहेत. आज ते कार्यभार स्वीकारणार आहेत.