BJP Politics : कोकणात महायुतीत पक्ष वाढीची स्पर्धा; भाजपचा मास्टर स्ट्रोक, कुडाळ येथे उद्या भाजपचा मेळावा

Sindhudurg News : कोकणात सध्याच्या घडीला आगामी निवडणुकांच्या पार्श्वभूमिवर भाजप एके भाजप या तत्वावर सदस्य नोंदणी केली जातेय. जानेवारीत झालेल्या सदस्य नोंदणीत सिंधुदुर्ग जिल्हा दुसऱ्या क्रमांकावर आला आहे. तर उपमुख्यमंत्री एकनाथ शिंदे यांची शिवसेना ऑपरेशन टायगर आणि आता ऑपरेशन शिवधनुष्य राबवत आहे. यातून ठाकरे गटातील अनेक नेते शिवसेनेत प्रवेश करणार आहेत. शिंदे यांच्या उपस्थितीत हा पक्षप्रवेश होणार आहे. पण याआधीच भाजपने येथे मास्टर स्ट्रोक खेळत आपल्याच मित्र पक्षाला शह दिला आहे. भाजप उद्या (ता.12) येथे मेळावा घेत असून यात विरोधी पक्षातील पदाधिकाऱ्यांचा पक्षप्रवेश होणार आहे.

भाजप कुडाळ तालुक्यातील ओरोस भवानी मंदिर नजीकच्या पटांगणावर भव्य मेळावा घेणार आहे. यासाठी पक्षाचे महाराष्ट्र कार्यकारी अध्यक्ष रवींद्र चव्हाण, पालकमंत्री नीतेश राणे आणि खासदार नारायण राणे यावेळी उपस्थित राहणार असून विरोधी पक्षातील पदाधिकाऱ्यांचा पक्षप्रवेश होणार आहे. याबाबतची माहिती जिल्हा सरचिटणीस रणजीत देसाई यांनी दिली.

देशातील नागरिकांनी आता हिंदुत्व आणि राष्ट्रीय आत्मियतेला महत्त्व देण्याचा निर्णय घेतला आहे. त्यामुळे 2024 मध्ये झालेल्या लोकसभा निवडणुकीत देशाने पुन्हा पंतप्रधान नरेंद्र मोदी यांच्यावर विश्वास ठेवत तिसऱ्या वेळी सत्ता दिली. सिंधुदुर्गात प्रथमच कमळ चिन्हावर निवडणूक होवून नारायण राणे विजयी झाले. त्यानंतर कोकणात झालेल्या शिक्षक आणि पदवीधर या दोन्ही विधान परिषद निवडणुकीत भाजपचे आमदार निवडून आले. डिसेंबरमध्ये झालेल्या विधानसभा निवडणुकीत महायुतीचे तिन्ही उमेदवार निवडून आल्याचे देसाई यांनी म्हटलं आहे.

भाजपने राबविलेल्या पक्ष सदस्य नोंदणीत ग्रामीण भागात सर्वाधिक नोंदणी केल्याने मुख्यमंत्री देवेंद्र फडणवीस यांनी जिल्हाध्यक्ष प्रभाकर सावंत यांचा सत्कार केला. या सर्व यशानंतर आता प्रत्येक तालुक्यात पक्षाचा मेळावा घेण्याचा निर्णय घेण्यात आला आहे. त्याप्रमाणे उद्या कुडाळ तालुक्यात पक्षाचा मेळावा होणार असून तालुक्यातील भाजपची ताकद दाखवू, असेही त्यांनी म्हटलं आहे.

महायुतीत फोडाफोडी नाही : सावंत

या मेळाव्याला अपेक्षेपेक्षा जास्त प्रतिसाद मिळत असून विरोधी पक्षातील कार्यकर्ते भाजपमध्ये मोठ्या संख्येने प्रवेश करणार आहेत. पण विरोधी पक्षातील चांगले चेहऱ्यांनाच पक्षात प्रवेश दिला जाईल. पण महायुतीतील कार्यकर्त्यांनी आम्ही घेणार नाही. त्यांचा विचार महायुतीचे नेतृत्व करेल. महायुतीतील सहकारी पक्षात फोडाफोडी करणार नाही, असे जिल्हाध्यक्ष सावंत यांनी सांगितले.