Praniti Shinde's Property : प्रणिती शिंदेंच्या संपत्तीत पाच वर्षांत पावणे दोन कोटींची वाढ; अवघे 300 ग्रॅम सोने

Solapur, 18 April : सोलापूर लोकसभा मतदारसंघाच्या काँग्रेसच्या उमेदवार आमदार प्रणिती शिंदे यांनी आज शक्तिप्रर्शन करत उमेदवारी अर्ज भरला. उमेदवारी अर्जासोबत जोडलेल्या प्रतिज्ञापत्रानुसार २०१९ च्या तुलनेत त्यांच्या संपत्तीत पाच वर्षांत एक कोटी ८१ लाख ४२ हजार १९२ रुपयांची वाढ झाली आहे. त्यांच्याकडे एकूण सहा कोटी ६० लाख ७० हजार ४०२ रुपयांची मालमत्ता आहे.

काँग्रेसचे प्रदेशाध्यक्ष नाना पटोले, माजी केंद्रीय गृहमंत्री सुशीलकुमार शिंदे, उज्ज्वला शिंदे आणि महाविकास आघाडीच्या स्थानिक नेत्यांच्या उपस्थितीत रॅली काढून आमदार प्रणिती शिंदे (Praniti Shinde) यांनी आपला उमेदवारी अर्ज भरला. त्या उमेदवारी अर्जासोबत जोडलेल्या प्रतिज्ञापत्रात शिंदे यांनी आपल्या संपत्तीचे विवरण दिले आहे.

प्रणिती शिंदे यांनी सोलापूर (Solapur) शहर मध्य विधानसभा मतदारसंघातून सलग तीन वेळा निवडून आल्या आहेत. मागील २०१९ च्या विधानसभा निवडणुकीवेळी त्यांनी जोडलेल्या प्रतिज्ञापत्रात चार कोटी ७० लाख २७ हजार २१० रुपयांची मालमत्ता दर्शविली होती. आता लोकसभा निवडणुकीसाठी भरलेल्या अर्जासोबतच्या प्रतिज्ञापत्रानुसार त्यांच्याकडे सहा कोटी ६० लाख ७० हजार ४०२ रुपयांची मालमत्ता तथा संपत्ती असल्याचे दिसून येते.

प्रणिती शिंदे यांनी आपल्या नावावर एकही दुचाकी, चारचाकी नाही, असे प्रतिज्ञापत्रात म्हटले आहे. त्यांच्या बॅंकांमधील ठेवी तथा रक्कम २०१९ च्या तुलनेत सुमारे ३० लाख रुपयांनी कमी झाली आहे. तसेच, आमदार प्रणिती शिंदे यांच्या नावावर एकाही बॅंकेचे कर्ज नसल्याचे या प्रतिज्ञापत्रात म्हटलेले आहे.

चारचाकी अथवा दुचाकी नाही

प्रणिती शिंदेंच्या नावावर एकही दुचाकी अथवा चारचाकी नाही;

जागा, जमीन व दागिन्यांमध्ये कोणतीही वाढ नाही

पाच वर्षांत दागिन्यात वाढ नाही, ३०० ग्रॅम सोने कायम

स्थावर मालमत्तेत एक कोटी ५२ लाख ५४४ रुपयांची वाढ

जंगम मालमत्तेत २९ लाख ३५ हजार ६४८ रुपयांची वाढ

बॅंकांमधील ठेवीत ३० लाखांची घट

२०१९च्या तुलनेत २०२४मध्ये एक कोटी ८१ लाख ४३ हजार १९२ रुपयांनी संपत्ती वाढली

संपत्ती

- प्रणिती शिंदे यांची शेअर बाजारात सुमारे १२ लाख रुपयांची गुंतवणूक आहे

-शिंदे यांच्या नावावर ५ एकर ७० गुंठे जमीन आहे.

- प्रणिती शिंदेंकडे ३०० ग्रॅम सोने

सोलापूर आणि दादरमध्ये निवासस्थान आहे.

वाहने आणि वैयक्तिक प्रकारचे कोणतेही कर्ज नाही

- बॅंका व टपालमधील ठेवी : ९९.५१ लाख रुपये

Edited By : Vijay Dudhale