Raju Shetti News : एकरकमी FRP साठी राजू शेट्टी कोर्टाची पायरी चढणार; सरकार अन् साखर संघाचे संगनमत असल्याचा आरोप...

Kolhapur Politics : राज्य सरकार व राज्य साखर संघाने संगनमताने नुरा कुस्ती खेळत आहे. राज्यातील उस उत्पादक शेतक-यांना पुन्हा एकदा तुकड्या तुकड्याने एफ. आर. पी. मिळावी याकरिता मुंबई उच्च न्यायालयात याचिका दाखल केली असल्याची माहिती स्वाभिमानी शेतकरी संघटनेचे संस्थापक राजू शेट्टी यांनी कोल्हापूर येथे पत्रकार परिषदेत दिली.

राज्यातील ऊस उत्पादक शेतक-यांच्या वतीने जवळपास तीन वर्षे न्यायालयीन लढाई करून एक रक्कमी एफ. आर. पी. देण्याचा निर्णय पुर्ववत करण्याबाबत मुंबई उच्च न्यायालयाकडून देण्यात आला होता. या प्रकरणामध्ये राज्यातील राज्य साखर संघ, राज्य सरकार, केंद्र सरकार हे सर्वजण शेतक-यांच्याविरोधात भुमिका मांडली होती, असे शेट्टींनी सांगितले.

एफ. आर. पी. कशापध्दतीने एकरकमी देणे कायदेशीररित्या बंधनकारक आहे, याबाबत 50 तास सुनावणी सुरू होती. या सुनावणी दरम्यान राज्य सरकार, राज्य साखर संघ व केंद्र सरकारने आपली भुमिका मांडली होती तरीही उच्च न्यायालयाने सर्व गोष्टीची कायदेशीर बाजू ऐकून घेऊनच हा निर्णय दिलेला होता, असेही शेट्टींनी स्पष्ट केले.

राज्यात ऊस उत्पादक शेतक-यांना वेळेवर बिले मिळत नसल्याने आत्महत्या करू लागले आहेत. याआधी राज्य साखर संघाने सर्वोच्च न्यायालयात धाव घेऊन या निर्णयास स्थगिती घेण्याचा प्रयत्न केला. मात्र त्यांना अपयश आल्याने राज्य सरकार व राज्य साखर संघ रडीचा डाव खेळत आहे, असा आरोप शेट्टींनी केला आहे. हा डाव यशस्वी होऊ देणार नाही, असा इशाराही त्यांनी सरकारला दिला.

दोघांच्या संगनमताने सदर प्रकरण न्यायालयात न्याय प्रविष्ट करून एक रक्कमी एफ. आर. पी न देण्याचा प्रयत्न जोरदारपणे सुरू आहे. सोमवारी या याचिकेमध्ये स्वाभिमानी शेतकरी संघटनेच्यावतीने ॲड. योगेश पांडे हे हस्तक्षेप याचिका दाखल करणार असल्याची माहिती राजू शेट्टी यांनी दिली.