Ramesh Kadam News : रमेश कदम यांना आठ वर्षांनंतर जामीन मंजूर; पण मुक्काम जेलमध्ये राहणार...

मुंबई : मोहोळचे राष्ट्रवादी काँग्रेसचे (NCP) माजी आमदार रमेश कदम (Ramesh Kadam) यांना मुंबई उच्च न्यायालयाने मोठा दिलासा देत जामीन मंजूर केला आहे. अण्णासाहेब साठे महामंडळातील गैरव्यवहारप्रकरणी कदम यांना आठ वर्षांनंतर एक लाख रुपयांच्या वैयक्तिक जातमुचलक्यावर हा जामीन मंजूर झाला आहे. जमीन देताना कदम यांनी मुंबई आणि ठाण्याबाहेर जाऊ नये, असे स्पष्ट निर्देश दिले आहेत. (Ramesh Kadam granted bail after eight years; But the stay will be in jail...)

दुसरीकडे, कदम यांच्यावर विविध प्रकरणांत गुन्हे दाखल झालेले आहेत. त्यामुळे साठे प्रकरणात त्यांना जामीन मिळाला असला तरी अन्य प्रकरणांमध्ये अटक कायम आहे. त्यामुळे कदम यांची लगेच कारागृहात सुटका होणार नसल्याचे स्पष्ट झाले आहे.

लोकशाहीर अण्णाभाऊ साठे आर्थिक विकास महामंडळाचे रमेश कदम हे अध्यक्ष हेाते. त्या कालावधीत त्यांनी अनेक बनावट लाभार्थी दाखवून शेकडो कोटींचा गैरव्यहार केल्याचा त्यांच्यावर आरोप आहे. लोकशाहीर अण्णाभाऊ साठे आर्थिक विकास महामंडळील गैरव्यवहाराचे ते मुख्य सूत्रधार आहेत. या गैरव्यवहारप्रकरणी कदम यांना आठ वर्षांपूर्वी अटक करण्यात होती.

गैरव्यवहार प्रकरणी अटक झाल्यानंतर रमेश कदम यांना राष्ट्रवादी काँग्रेसमधून निलंबित करण्यात आले होते. या गैरव्यवहाराबाबत माजी मंत्री लक्ष्मण ढोबळे यांनी कदम यांच्यावर थेट आरोप केला होता. अण्णाभाऊ साठे महामंडळात २५० कोटींचा गैरव्यवहार झाला असून त्याचे ३७०० पानी पुरावे आपण लाचलुचपतसह सर्व विभागांना दिले आहेत, असा दावाही ढोबळेंनी केला हेाता.

महामंडळाचे अध्यक्ष असताना रमेश कदम यांनी ७३ जणांची भरती कोणतीही प्रक्रिया न राबवता केली होती. नियुक्त कर्मचाऱ्यांना गृहकर्ज म्हणून २० लाख रुपये उपलब्ध करून देण्यात आले होते. त्यातील सुमारे १५ लाख रुपये लाच म्हणून घेण्यात आले होते. अनेक प्रकरणांवर बनावट सह्या करण्यात आल्या होत्या. परस्पर लाभार्थींचे धनादेश वाटण्यात आले होते. तसेच बारामती तालुक्यातील खंडाळी येथील महालक्ष्मी दूध संस्थेला पाच कोटी दिल्याचे कागदोपत्री दाखविण्यात आले होते. तसेच, रमेश कदम यांनी विधानसभा निवडणुकीच्या काळातही ६ कोटी ५६ लाख रुपये वाटल्याचा आरोप होता.