Sambhajiraje Chhatrapati : 13 जुलैला शिवभक्त विशाळगडावर; अतिक्रमण हटवण्‍यासाठी संभाजीराजे आक्रमक!

Sambhajiraje Chhatrapati News : किल्ले विशाळगडावर झालेल्या अतिक्रमणा विरोधात शिवभक्तांमध्ये संतापाची लाट आहे. किल्ले विशाळगड अतिक्रमणमुक्त करावा यासाठी सकल हिंदू समाजाच्या वतीने आंदोलनाचे हत्यार उपसले आहे.

माजी खासदार संभाजीराजे छत्रपती हे देखील आता किल्ले विशाळगडा या मुद्द्यावरून आक्रमक झाले आहेत. किल्ल्यांवरील अतिक्रमण काढण्यासाठी मुख्यमंत्री, उपमुख्यमंत्री यांनी शब्द दिला असताना अद्याप अतिक्रमणाबाबत कोणतीच भूमिका घेत नसल्याने शिवभक्तांच्या भावना अनावर झाल्या आहेत.

संभाजीराजे छत्रपती यांनी रविवारी राज्यातील गडप्रेमी आणि शिवभक्तांची बैठक घेऊन 13 जुलै रोजी किल्ले विशाळगडावर शिवभक्तांसह दाखल होणार. त्याठिकाणी काय करणार हे आताच सांगणार नाही असा इशारा संभाजीराजे छत्रपती यांनी सरकारला दिला आहे. शासकीय विश्राम गृहात आयोजित शिवभक्तांच्या बैठकीत ते बोलत होते.

काही वर्षापासून किल्ले विशाळगडावर अतिक्रमण आहे. राजरोसपणे अतिक्रमण वाढत असताना प्रशासनाने याच्याकडे दुर्लक्ष केले आहे. यात्रेच्या निमित्ताने कत्तलखाने आहेत. कोंबड्या, बकरी कापल्या जातात. मद्यपान होत असून दिवसाढवळ्या जुगाराचे डाव बसतात. त्यामुळे गडाचे पावित्र्य धोक्यात आले असून विशाळगड अतिक्रमण मुक्त व्हावा यासाठी शिवभक्तांचा प्रयत्न आहे.

दीड वर्षापूर्वी बैठक घेऊन विशाळगड अतिक्रमण मुक्त करण्याच्या सूचना प्रशासनला दिल्या होत्या. दीड वर्षात शासन, प्रशासनाने यासाठी काहीही केले नाही. म्हणून 13 जुलैला दुपारी दोन वाजता माझ्यासह राज्यातील शिवभक्त विशाळगडावर धडक देतील, असा इशारा माजी खासदार संभाजीराजे (Sambhajiraje Chhatrapati) यांनी रविवारी दिला.

दरम्यान, या बैठकीवेळी संभाजीराजे छत्रपती यांनी मुख्यमंत्री एकनाथ शिंदे उपमुख्यमंत्री देवेंद्र फडणवीस उपमुख्यमंत्री अजित पवार (Ajit Pawar) यांनाच जबाबदार धरले आहे. किल्ले रायगडावर राज्याभिषेक सोहळ्याला आल्यानंतर राजदरबारावरून विशाळगड अतिक्रमण मुक्तीसंबंधी शिवभक्ताच्या मनात जे आहे तेच होईल, असे सांगितले होते. पण अद्याप अतिक्रमण मुक्त झालेला नाही. त्यामुळे या तिघांच्या मनात काय आहे हे शिवभक्तांना आता पाहायचच आहे. असं सूचक विधान संभाजीराजे छत्रपती यांनी केले.