Satara DCC Bank Election : सातारा जिल्हा बँक निवडणुकीत ट्विस्ट : भाजप आमदार अतुल भोसलेंचा रामराजे नाईक निंबाळकरांच्या मतदारसंघातून अर्ज

Karad News, 01 Oct : सातारा जिल्हा मध्यवर्ती सहकारी बँकेच्या निवडणुकीत राजकीय घडामोडींना वेग आला आहे. महायुतीच्या वतीने भाजपचे आमदार अतुलबाबा भोसले यांनी कृषी उत्पादन व प्रक्रिया संस्था गटातून उमेदवारी अर्ज दाखल केला आहे. या मतदारसंघातून माजी सभापती रामराजे नाईक-निंबाळकर यांचाही अर्ज आहे.

अर्ज दाखल केल्यानंतरही आपली अंतिम उमेदवारी अद्याप निश्चित नसल्याचं त्यांनी सांगितलं. माझ्या उमेदवारी अर्जाबाबत रामराजेंसह महायुतीतील नेत्यांशी चर्चा करून निर्णय होईल. थोडे पुढे-मागे सरकण्याची आमची तयारी आहे, असे भाजपचे जिल्हाध्यक्ष आमदार डॉ. अतुल भोसले यांनी स्पष्ट केले.

उमेदवारी अर्ज दाखल करताना यशवंतराव मोहिते कृष्णा सहकारी साखर कारखान्याचे अध्यक्ष डॉ. सुरेश भोसले, कराड उत्तरचे आमदार मनोज घोरपडे आणि रयत सहकारी साखर कारखान्याचे अध्यक्ष उदयसिंह पाटील यांच्यासह इतर मान्यवर उपस्थित होते. उदयसिंह पाटील हे सूचक, तर नामदेव सावंत हे अनुमोदक आहेत.

“महायुती म्हणून निवडणुकीला सामोरं जाताना तिन्ही पक्षांचे नेते चर्चा करतील. चर्चेतून कोणाचे अर्ज ठेवायचे, हे निश्चित होईल. त्यामुळे आज अर्ज जरी भरला असला, तरी अंतिम निर्णय येणाऱ्या काही दिवसांत निश्चित होईल,” असं म्हणत अतुल भोसले यांनी आपली उमेदवारी अंतिम नसल्याचं स्पष्ट केलं असलं, तरी सोसायटी गटातून उदयसिंह पाटील यांचा अर्ज निश्चित राहणार असल्याचंही त्यांनी सांगितलं आहे.

“उदयदादांचा अर्ज सोसायटी गटामधून आम्ही सगळ्यांनी मिळून दाखल केलेला आहे. आजच्या घडीला सोसायटी गटामधून त्यांचा अर्ज निश्चित राहील आणि माझ्या अर्जाचं काय व्हायचं, हे पक्षपातळीवर चर्चा केल्यानंतर ठरेल, थोडे पुढे-मागे सरकायची वेळ आली, तरी तीही तयारी आम्ही ठेवली आहे, असं भोसले म्हणाले.

त्यामुळे सातारा जिल्हा बँकेच्या निवडणुकीत महायुतीच्या जागावाटपाचं आणि अंतिम उमेदवारांचं चित्र अद्याप स्पष्ट झालेलं नाही. जिल्हा बँकेच्या २१ संचालक पदांसाठी निवडणूक होत असून, १ नोव्हेंबरला मतदान होणार आहे. त्यामुळे अतुलबाबांचा अर्ज कायम राहणार की महायुतीच्या चर्चेनंतर वेगळा निर्णय होणार, याकडे आता लक्ष लागलं आहे.