Lok Sabha Election : महाविकास आघाडीचे जागावाटप होण्यापूर्वीच साताऱ्यातील नेत्यांचा मोठा निर्णय; राज्यभरात चर्चा

Lok Sabha Election 2024 : साताऱ्यात आजा महाविकास आघाडीची मोठी बैठक झाली. सातारा लोकसभा मतदारसंघासह आगामी सर्वच निवडणुका महाविकास आघाडी म्हणून एकत्र लढाव्यात, असा एक सूर आजच्या महाविकास आघाडीच्या बैठकीत निघाला. महाविकास आघाडीचा राज्य स्तरावर अद्याप जागावाटप झाले नसताना त्यापूर्वीच साताऱ्यातील महाविकास आघाडीच्या नेत्यांनी निर्णय घेतला आहे. यामुळे या निर्णयाची राज्यभरात चर्चा होत आहे.

सातारा लोकसभा मतदारसंघावरून एकीकडे महायुतीतील भाजप, शिवसेना शिंदे गट आणि राष्ट्रवादी काँग्रेसच्या अजित पवार गटाकडून दावे-प्रतिदावे सुरू आहेत, तर दुसरीकडे लोकसभा निवडणुकीच्या मुद्द्यावरून महाविकास आघाडीची आज साताऱ्यातील राष्ट्रवादी भवनात महत्त्वाची बैठक पार पडली. या बैठकीस राष्ट्रवादीचे आमदार शशिकांत शिंदे, सत्यजित पाटणकर, दीपक पवार काँग्रेसचे डॉ. सुरेश जाधव, विजयराव कणसे, नरेश देसाई, शिवसेनेचे हर्षल कदम, सचिन मोहिते आदी उपस्थित होते.

सातारा लोकसभा मतदारसंघाच्या जागेवरून सध्या महायुतीत वाद पेटला आहे. शिवसेनेच्या हक्काच्या जागेवर भाजपने जय्यत तयार केली आहे. तर अजित पवार गटानेही आपला उमेदवार देण्याचे जाहीर केले आहे. त्यामुळे महायुतीतील हा जागा वाटपाचा पेच सातारा लोकसभेच्या मुद्द्यावर अडखळणार आहे. या पार्श्वभूमीवर महाविकास आघाडीच्या नेत्यांनी सावध पवित्रा घेतला आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

सातारा लोकसभा मतदारसंघासाठी महाविकास आघाडीची मोट अधिक घट्ट करण्याचा निर्णय घेण्यात आला आहे. त्यानुसार आज सातारा जिल्हा राष्ट्रवादी भावनात महाविकास आघाडीतील पक्षांच्या नेत्यांची बैठक झाली. या बैठकीत बहुतांशी पदाधिकाऱ्यांनी आगामी लोकसभा निवडणुकीसह सर्वच निवडणुका महाविकास आघाडी म्हणून एकत्र लढवण्याची तयारी दर्शवली. आता या संदर्भात महाविकास आघाडीच्या प्रमुख नेत्यांच्या बैठकीत यावर शिक्कामोर्तब होईल. तसे झाल्यास सातारा लोकसभा मतदारसंघातील लढत महायुतीला जड जाण्याची शक्यता आहे.

Edited by sachin fulpagare