Pune News : पुण्यात राष्ट्रवादी काँग्रेस शरदचंद्र पवार पक्षाचा 26 वा वर्धापन दिन मोठ्या थाटात करण्यात आला. यावेळी पक्षाचे प्रदेशाध्यक्ष जयंत पाटलांसह खासदार सुप्रिया सुळेंनी देखील दिवंगत आर. आर. पाटील यांची आठवण काढली. त्यांच्या आठवणींना उजाळा दिला. पण पक्षाचे सर्वेसर्वा शरद पवार यांनी आबांचा सांगितलेला किस्सा सध्या चर्चेत आहे.
शरद पवार यांनी रावसाहेब रामराव पाटील उर्फ आर. आर. पाटील यांच्याबद्दल किस्सा सांगताना एका बैठकीचा उल्लेख केला. यावेळी शरद पवार म्हणाले, तुमच्यामधले अनेक सहकारी कधी सत्तेवर नव्हते. पण ज्यांना संधी मिळाली आणि त्यांच्यामुळे समाजात महाराष्ट्रात एक संदेश गेला. प्रशासन चालवायला सामान्य कुटुंबातल्या प्रामाणिक कार्यकर्त्याला संधी मिळाल्यानंतर तोही कर्तृत्व दाखवू शकतो आणि राज्य चालवू शकतो.
या यादीत अनेक नावे सांगता येतील. यात आपले प्रदेशाध्यक्ष जयंत पाटील यांचे देखील नाव असून त्यांनी अर्थमंत्री म्हणून 10 वर्ष काम केलं. अनिलबाबू (अनिल देशमुख), जितेंद्र आव्हाड, फौजियाताई यांच्यासह अनेकांची नावं या ठिकाणी घेता येतील. पण सध्याच्या घडीला एक नाव आठवते ते म्हणजे आबांचे. आर. आर. पाटलांचे. आर. आर. पाटील तुमच्यातलाच सामान्य कार्यकर्ता. ज्यांनी कष्ट केले आणि पक्षाला वाढवले. पण आज दुर्दैवाने ते हयात नाहीत. आर. आर. आबा सामान्य कुटुंबातले होते.
यावेळी शरद पवार म्हणाले की, मला आजही आठवतंय की, मी सांगली जिल्ह्याच्या दौऱ्यावर होतो. तरुणांची बैठक सुरू होती. त्यात एक दोन लोक फार चांगलं बोलले. मी चौकशी केली की, हा कोण आहे मुलगा? त्यावेळी मला सांगण्यात आलं त्यांचं नाव आर. आर. पाटील. मी बोलावून घेतलं त्यांच्याशी सुसंवाद केला, माझ्या लक्षात आलं की यांच्यात कर्तुत्व आहे. लगेचच जिल्हा परिषदेच्या निवडणुका होत्या, त्यांना उभं करण्याचा निर्णय झाला. नंतर विधानसभेची संधी मिळाली, तिथेही प्रभावी आमदार म्हणून त्यांनी काम केलं.
दुसऱ्या निवडणुकीमध्ये सत्ता आली, ग्रामविकास खात्याचं काम त्यांच्याकडे आलं. नंतर राज्याचे उपमुख्यमंत्री आणि गृहमंत्री म्हणून त्यांनी काम केलं. त्यांचे अनेक निर्णय महाराष्ट्राच्या जनतेला भावले. त्यातून एक संदेश गेला की, राष्ट्रवादी काँग्रेस पक्ष सामान्य कुटुंबातील तरुणांना घेऊनसुद्धा त्यांना संधी देतं.
त्यांच्यामार्फत महाराष्ट्राचा चेहरा बदलण्यासाठी कष्ट करणाऱ्या कार्यकर्त्यांचा हा पक्ष आहे. त्यामुळे, तुम्हा सगळ्यांच्या कष्टामुळे, बांधिलकीमुळे आणि वैचारिक स्पष्टतेमुळे ही पक्षाची प्रतिष्ठा वाढल्याचेही शरद पवार म्हणाले.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.