NCP-SP : आगामी 'स्थानिक'साठी रणनीती ठरली? राष्ट्रवादी शरदचंद्र पवार पक्षातर्फे महापालिकेसाठी चाचपणी सुरू

Sangli Political News : आगामी स्थानिक स्वराज्य संस्थांच्या निवडणुकीच्या तयारीसह संघटनबांधणी मजबूत करण्यासाठी राज्यातील सर्वच राजकीय पक्ष तयारीला लागले आहेत. सांगली, मिरज, कुपवाड महानगरपालिका ताब्यात घेण्यासाठी भाजप, एकनाथ शिंदे यांची शिवसेना आणि अजित पवार यांची राष्ट्रवादी तयारीला लागली आहे.

स्थानिक नेत्यांसह माजी आमदारांना पक्षात घेऊन ताकद वाढवली जात आहे. अशातच राष्ट्रवादी काँग्रेस शरदचंद्र पवार पक्षाला सांगलीत राजकीय अस्तित्वासाठी झगडावे लागत आहे. अशावेळी आगामी 'स्थानिक'साठी रणनीती आखण्याचे काम पक्षाने सुरू केले आहे. तर लवकरच प्रभागनिहाय बैठका आणि इच्छुक उमेदवारांची चाचपणी केली जाणार आहे.

आगामी स्थानिक स्वराज्य संस्थांच्या पार्श्वभूमीवर निवडणुकीच्या सर्वच राजकीय पक्ष तयारीला लागले आहेत. तर जे दुर्लक्षीत असणारे माजी आमदार, पदाधिकारी आता सत्ताधारी पक्षांच्या वाट धरत आहेत. होमग्राउंडवरच राष्ट्रवादी काँग्रेस शरदचंद्र पवार पक्षाचे प्रदेशाध्यक्ष जयंत पाटील यांना अजित पवार यांनी आव्हान उभे केलं होतं.

त्यांनी जयंत पाटील यांना धक्का देत माजी आमदार शिवाजीराव नाईक यांना पक्षात प्रवेश देण्याचे ठरवले आहे. यामुळे आगामी स्थानिक स्वराज्य संस्थांच्या निवडणुकीत शरद पवार गटाचं नेमकं काय होणार असा सवाल उपस्थित केला जात होता.

पण राष्ट्रवादी काँग्रेस शरदचंद्र पवार पक्षाची सांगली शहर-जिल्हा कार्यकारिणी तसेच प्रदेश पदाधिकारी, फ्रंटल सेल तसेच संघटनांच्या शहर-जिल्हाध्यक्षांची आढावा बैठक शहर-जिल्हाध्यक्ष संजय बजाज यांनी घेत सगळ्या प्रश्नांना उत्तर दिलं आहे. त्यांनी यावेळी सांगली, मिरज व कुपवाड तिन्ही शहरांचा आढावा घेतला आहे.

तसेच आगामी निवडणुकीच्या पार्श्वभूमीवर राष्ट्रीय अध्यक्ष शरद पवार यांच्या संकल्पनेतून आणि प्रदेशाध्यक्ष जयंत पाटील यांच्या सूचनेनुसार आगामी महानगरपालिका निवडणुकीच्या अनुषंगाने तयारी करण्यासाठी संघटनबांधणी मजबूत करण्यासाठी बैठकीत सर्व बाबींवर चर्चा करताना महत्वाचे आदेशही दिले आहेत.

बजाज यांनी सर्व शहर-जिल्हाध्यक्षांसह पदाधिकाऱ्यांना आपापल्या प्रभागात संघटनबांधणीवर भर देण्याच्या सूचना करण्यात आल्या आहेत. तर लवकरच प्रभागनिहाय बैठका आणि इच्छुक उमेदवारांची चाचपणी सुरू केली जाणार असल्याते स्पष्ट करण्यात आले आहे.

यावेळी महिला शहर-जिल्हाध्यक्षा संगीता हारगे, सचिन जगदाळे, सागर घोडके, अभिजित हारगे, धनपाल खोत, तानाजी गडदे, हरिदास पाटील, उत्तम कांबळे, समीर कुपवाडे, ज्योती अदाटे, महालिंग हेगडे, युवराज गायकवाड, चंद्रकांत हुलवान, अर्जुन कांबळे, विनायक हेगडे, शीतल खाडे, फिरोज मुल्ला, संगीता जाधव, अमृता चोपडे, विनायक हेगडे, अभिजित रांजणे आदी पदाधिकारी उपस्थित होते