Sharad Pawar Solapur Tour : शरद पवारांचा सोलापूर दौरा रद्द; हे आहे कारण

Solapur, 12 April : ज्येष्ठ नेते शरद पवार यांचा सोलापूर दौरा अचानक रद्द झाला असून ते (स्व.) चंद्राम गुरुजींच्या पुतळ्याचे ऑनलाईन पद्धतीने अनावरण करणार आहेत, त्यामुळे पवारांच्या दौऱ्याकडे डोळे लावून बसलेल्या राष्ट्रवादी काँग्रेस शरदचंद्र पवार पक्षाच्या कार्यकर्त्यांचा हिरमोड झाला आहे. अनेकांना पवारांना भेटण्याची इच्छाही अपूर्ण राहणार आहे.

रयत शिक्षण संस्थेच्या मॅनेजिंग कौन्सिलची बैठक आज दुपारी दोनपासून सुरू होणार आहे. तत्पूर्वी ते सध्या यशवंतराव चव्हाण सायन्स महाविद्यालयातील इनोव्हेशन सेंटरला भेट देणार आहेत. त्यानंतर शरद पवार (Sharad Pawar) हे दोन वाजता रयत शिक्षण संस्थेच्या मॅनेजिंग कौन्सिलच्या बैठकीला जाणार आहेत. ही बैठक सायंकाळी उशिरापर्यंत चालणार आहे, त्यामुळेच शरद पवार यांना आपला सोलापूर दौरा रद्द करावा लागला आहे.

रयत शिक्षण संस्थेच्या मॅनेजिंग कौन्सिलची बैठक उशिरापर्यंत चालणार आहे. तसेच, सोलापूरमध्ये नाईट लॅंडिंगची सोय नसल्यामुळे शरद पवार यांना सोलापूर (Solapur) पोचण्यास अडचणी येत आहेत, त्यामुळे शरद पवार यांनी सोलापूरचा रद्द केला आहे. पवार हे (स्व.) चंद्राम गुरुजी यांच्या पूर्णाकृती पुतळ्याचे अनावरण ऑनलाईन पद्धतीने करणार आहेत.

दरम्यान, शरद पवार हे विधानसभा निवडणुकीनंतर प्रथमच सोलापूरच्या दौऱ्यावर येणार होते, त्यामुळे पक्षसंघटनेतील अनेक नेत्यांनी पवारांच्या दौऱ्याकडे डोळे लावले होते. विधानसभा निवडणुकीत संपूर्ण महाराष्ट्रात महायुतीची वादळ घोंघावत असताना सोलापूर जिल्ह्याने मात्र पवारांवरील प्रेम कायम राखले होते. कारण एकट्या सोलापूरमधून राष्ट्रवादी काँग्रेस शरदचंद्र पवार पक्षाचे चार आमदार निवडून आले आहेत.

संपूर्ण राज्यातून शरद पवार यांच्या राष्ट्रवादी काँग्रेसचे दहा आमदार निवडून आले आहेत. मात्र, एकट्या सोलापूरने पवारांचे चार आमदार निवडून दिले आहेत, त्यामुळे पवार सोलापूरमध्ये काय बोलणार याकडे राजकीय वर्तुळाचे लक्ष लागले होते.

स्थानिक स्वराज्य संस्थांच्या आगामी निवडणुकीच्या पार्श्वभूमीवर शरद पवार यांचा दौरा महत्वपूर्ण मानला जात होता. लोकसभा आणि विधानसभा निवडणकीत असणारी पक्षाची शिस्त काहींसी बिघडली आहे. पक्षसंघटनेला शिस्त लावण्यासोबतच सोलापूर शहर राष्ट्रवादी काँग्रेस शरदचंद्र पवार पक्षाला पुन्हा वैभव मिळवावे लागणार आहे.