Shivsena UBT Politics : गोकुळमधील भ्रष्टाचाराच्या भानगडी थांबवून मंत्री मुश्रीफांनी लेखी उत्तर द्यावे, ठाकरेंची सेना आक्रमक

Summary :

1. शिवसेना (उद्धव बाळासाहेब) चे उपनेते संजय पवार यांनी गोकुळ दूध संघातील घोटाळ्यावरून मंत्री मुश्रीफ यांच्यावर हल्ला केला.

2. शेतकऱ्यांच्या कष्टाचे पैसे वाया जात असल्याचा सवाल त्यांनी उपस्थित केला.

3. पशुखाद्य, जाजम आणि घड्याळ घोटाळ्याचा संदर्भ देत मुश्रीफ यांनी जबाबदारी घ्यावी अशी मागणी केली.

4. चुकीचे काम करणाऱ्यांना शिक्षा करा, मात्र योग्य काम करणाऱ्यांना पाठिंबा द्या, असे पवार म्हणाले.

5. पत्रकार परिषदेत बोलताना पवारांनी मंत्री मुश्रीफ यांनी लेखी उत्तर द्यावे, अशी मागणी केली.

Kolhapur News : शेतकऱ्यांच्या कष्टाचे पैसे कोणी खात आहे का? हे देखील गोकुळमध्ये मंत्री मुश्रीफ यांनी पाहणे महत्त्वाचे आहे. जे चांगले काम करत आहेत. त्यांची पाठ थोपटा अन् जे चुकीचे काम करत आहेत, त्यांना शिक्षा करा. मात्र चुकीच्या कामाला मंत्री मुश्रीफ हे बरोबर सांगत असतील तर त्यांनीच आता लेखी उत्तर द्यावे. कारभार चांगलाच चालला असेल तर मंत्री मुश्रीफ यांनी पुढे यायला हवं. पशुखाद्य घोटाळा झाला. त्यामुळे मंत्री मुश्रीफ यांनी गोकुळ मधल्या सर्व भानगडी थांबवाव्यात. अशा शब्दात उद्धव बाळासाहेब ठाकरेंच्या शिवसेनेचे उपनेते संजय पवार यांनी गोकुळच्या जाजम आणि घड्याळ घोटाळ्यावरून सुनावले आहे. आज पत्रकार परिषदेत बोलत होते.

गोकुळ दूध संघातील दूध उत्पादक संस्थांसाठी 3 कोटी 74 लाखांचे जाजम व घड्याळ ज्या भेटवस्तू संस्थांना देण्यात आले होते. ही प्रक्रिया निविदा काढून देणे योग्य व कायदेशीर होते. परंतु सत्तेचा दुरुपयोग करून निविदा न काढता कोटेशन पद्धतीने कोट्यावधी रुपयांची बेकायदेशीर खरेदी केली असल्याचा आरोप ठाकरेंच्या शिवसेनेच्या वतीने करण्यात आली होती.

दूध संस्थांना भेटवस्तू देण्यास आमचा कधीही विरोध नव्हता परंतु ज्या पद्धतीने जाजम व घड्याळाची खरेदी झाली आहे. त्यात मोठ्या प्रमाणात आर्थिक घोटाळा झाला असल्याचा आरोप उपनेते संजय पवार यांनी केला.

दूध उत्पादक शेतकरी यांच्या कष्टाचे व घामाच्या पैशांचा दुरुपयोग होऊन कोणीतरी डल्ला मारणे हे योग्य नाही. गोकुळ दूध संघ हा दूध उत्पादक शेतकऱ्यांचा असून तो राजकीय अड्डा बनत चालला आहे. यातूनच कधी ते मेडिटेशनसाठी सहकुटुंब फाईव्ह स्टार हॉटेलमध्ये गोवा सहल, पशुखाद्य घोटाळा, जाजम व घड्याळ खरेदी, वासाचे दूध इत्यादी मार्गाने या गोकुळच्या हंडीतील लोणी खाण्याचे काम पद्धतशीरपणे सुरू असल्याने कष्टकरी शेतकऱ्यांचे मोठे नुकसान होत आहे. असेही पवार म्हणाले.

लेखापरीक्षक गोसावी यांनी कोणत्याही राजकीय दबावाला बळी न पडता कष्टकरी शेतकरी व गोकुळ दूध यांचे नाते डोळ्यासमोर ठेवून पारदर्शकपणे चौकशी करावी. संबंधितांकडून पैसे वसूल करण्यासंदर्भात निर्णय करावा तसेच कायदेशीर कठोर कारवाई करावी, अन्यथा चुकीचा निर्णय झाल्यास त्यांना सुद्धा जाब विचारावा लागेल असा इशारा उपनेते संजय पवार यांनी दिला.

FAQs :

प्र.१: संजय पवारांनी कोणत्या घोटाळ्यांचा उल्लेख केला?
उ. पशुखाद्य, जाजम आणि घड्याळ घोटाळा.

प्र.२: संजय पवार कोणत्या पक्षाचे नेते आहेत?
उ. उद्धव बाळासाहेब ठाकरे गटाचे शिवसेना उपनेते.

प्र.३: संजय पवारांनी मंत्री मुश्रीफ यांना काय मागणी केली?
उ. गोकुळमधल्या सर्व भानगडी थांबवाव्यात आणि लेखी उत्तर द्यावे.

प्र.४: शेतकऱ्यांच्या पैशांबाबत पवारांनी काय म्हटलं?
उ. शेतकऱ्यांच्या कष्टाचे पैसे कोणी खात आहे का, असा सवाल केला.

प्र.५: संजय पवार कुठे बोलले?
उ. त्यांनी पत्रकार परिषदेत हे विधान केले.