Shoumika Mahadik: मग्रूर व खुनशी प्रवृत्तीला...!; 'गोकुळ'वर महायुतीचा अध्यक्ष होताच शौमिका महाडिकांनी केला पहिला वार

Kolhapur News : कोल्हापूर जिल्हा दूध उत्पादक संघावर महायुतीचा अध्यक्ष व्हावा यासाठी मुख्यमंत्री देवेंद्र फडणवीस यांनी राजकारण ढवळून काढलं. थेट वैद्यकीय शिक्षण मंत्री हसन मुश्रीफ यांच्यावर दबाव टाकत कोणत्याही परिस्थितीत गोकुळ दूध संघावर महायुती अध्यक्ष करा, शब्द टाकल्याने थंड झालेल्या हालचाली पुन्हा एकदा गतिमान झाल्या. त्यामुळे गोकुळ दूध (Gokul Milk) संघाच्या अध्यक्षपदी मंत्री मुश्रीफ यांचे चिरंजीव नवीद मुश्रीफ विराजमान झाले.

कोणत्याही परिस्थितीत सतेज पाटील गटाचा अध्यक्ष होऊ द्यायचा नाही असा अप्रत्यक्षपणे चंग बांधलेल्या महाडिक गटाने अध्यक्षपदाची निवड झाल्यानंतर फेसबुक पोस्टवरून हल्लाबोल केला आहे. गोकुळच्या संचालिका शौमिका महाडिक यांनी फेसबुक वर पोस्ट करत, मग्रूर आणि खुनशी प्रवृत्तीला काही गोष्टींची जाणीव करून देण्यासाठी चेअरमन निवड महत्त्वाची होती. शब्दात प्रहार केला आहे.

शौमिका महाडिक नेमकं काय म्हणाल्या ?

अनेकदा आपण पाहिलंय.राजकारणामध्ये माणसं कधीकधी इतकी हवेत जातात की, आपल्यापेक्षा वर सुद्धा कोणीतरी बसलेलं आहे हे ठार विसरून जातात. आपल्या जिल्ह्याच्या राजकारणामध्ये सुद्धा "मलाच सगळं समजतं. आणि मी म्हणेल तेच खरं.." अशी एक मग्रूर प्रवृत्ती दुर्दैवाने अस्तित्वात आहे.

या मग्रूर आणि खुनशी प्रवृत्तीला काही गोष्टींची जाणीव करून देण्याच्या दृष्टीने ही चेअरमन निवड महत्वाची होती, असं मला वाटतं. आणि ते काम चांगल्या पद्धतीने पार पडलेलं आहे त्यामुळे आता त्यावर अधिकच भाष्य करणं योग्य होणार नाही.

बऱ्याच घडामोडीनंतर अखेर आज नविद मुश्रीफ यांची चेअरमन पदी निवड झालेली आहे. आज राज्याच्या व जिल्ह्याच्या राजकारणामध्ये आदरणीय देवेंद्र फडणवीस साहेब, आदरणीय अजितदादा पवार आणि आदरणीय एकनाथ शिंदे साहेब यांच्या नेतृत्वाखाली महायुती म्हणून आम्ही सगळे एकत्र काम करत आहोत.

त्यामुळे आपल्या युतीतील एखाद्या सहकाऱ्याची अशा महत्वाच्या पदावर निवड होते, तेव्हा निश्चितच आनंद होतो. भविष्यामध्ये गोकुळ दूध संघाच्या प्रगतीसाठी चांगलं काम नविद मुश्रीफ यांच्या हातून घडो, याच माझ्या त्यांना सदिच्छा राहतील, अशा शब्दांत गोकुळच्या संचालिका शौमिका महाडिक (Shoumika Mahadik) यांनी प्रतिक्रिया दिली आहे.