Yogesh Kadam : योगेश कदमांचे आव्हान ठाकरेंची शिवसेना पेलणार? कसं राखणार मंडणगड?

Ratnagiri News : काही दिवसांपूर्वीच दापोलीतील पाच नगरसेवकांनी वेगळा गट करून गृहराज्यमंत्री आमदार योगेश कदम यांच्या नेतृत्वात शिंदे गटात प्रवेश केला होता. यामुळे दापोली नगरपंचायतील राजकीय समिकरणं बदलण्याची शक्यता निर्माण झाली आहे. अशातच योगेश कदम यांनी आपला मोर्चा मंडणगड नगरपंचायतीकडे वळवताना येथेही ऑपरेशन टायगर केले जाईल असे संकेत दिले होते. त्यांनी 'मंडणगड नगरपंचायतीवर लवकरच शिवसेनेचा भगवा फडकवू' असा दावा केला होता. आता हे आव्हान येथे ठाकरेंची शिवसेना आणि अजित पवार यांची राष्ट्रवादी पेलणार का हे पहावं लागणार आहे.

राज्यमंत्री योगेश कदम यांच्या वाढदिवसानिमित्त दापोलीतील पाच नगरसेवकांनी वेगळा गट करून शिवसेनेमध्ये प्रवेश केला होता. त्यावेळी कदम यांनी आपल्यावर नगरपंचायतीच्या निवडणुकीवेळी अन्याय केला गेला. पण जो अन्याय झाला त्याला वाचा फोडण्याचे काम शिवसैनिकांनी केल्याचे म्हणत याचा वचपा आपण ऑपरेशन टायगरमधून काढू असे संकेत दिले होते.

तर उबाठाच्या पाचजणांनी शिंदे सेनेत प्रवेश करतानाच दापोलीचा पुढील नगराध्यक्ष शिवसेनेचाच होईल. दापोली शहराच्या विकासासाठी उपमुख्यमंत्री एकनाथ शिंदे यांच्या माध्यमातून तसेच महायुतीच्या माध्यमातून शहराचा विकास केला जाईल ग्वाही कदम यांनी दिली होती.

यानंतरच त्यांनी आपला मोर्चा मंडणगड नगरपंचायतीकडे वळवला असून येथे भगवा फडकवू असा दावा केला होता. याची पूर्व तयारी म्हणून नगरसेवकांच्या स्वकीयांचा शिंदे सेनेत प्रवेश घडवून आणला. त्यांच्या या कृतीने लवकरच मंडणगड नगरपंचायतीत ऑपरेशन टायगर होणार अशा चर्चा सुरू झाल्या होत्या. यानंतर आता याचे पडसाद मंडणगड नगरपंचायतीत उमटण्याची शक्यता आहे.

मंडणगड नगरपंचायतीतील ठाकरे गट आणि अजित पवार यांच्या राष्ट्रवादीची सत्ता आहे. येथे सध्या काठावरचे बहुमत असल्यानेच 'मंडणगड नगरपंचायतीवर लवकरच शिवसेनेचा भगवा फडकवू' असा दावा गृहराज्यमंत्री आमदार योगेश कदम यांनी केला आहे. यामुळे ठाकरे गटाच्या हातून येथील ही सत्ता आता जाणार का? अशी स्थिती निर्माण झाली आहे. दरम्यान मंडणगड नगरपंचायतीचे विविध विषय समिती सभापती निवड समितीची निवडप्रक्रिया आज (ता. 21) होणार आहे. पण योगेश कदम यांच्या नगरपंचायतीवर भगवा फडकवण्याच्या घोषणेमुळे सध्या नगरसेवकांमध्ये गोंधळाचे वातावरण तयार झाले आहे.

सध्या मंडणगड नगरपंचायतीत राज्यात सत्तेत असणारे मित्रपक्ष एकमेकांच्या विरोधात उभे आहेत. येथे सत्तेत अजित पवार यांची राष्ट्रवादी काँग्रेस असून त्यांनी ठाकरेंच्या शिवसेने सोबत येथे हाथ मिळवणी केली आहे. सध्या राष्ट्रवादीकडे नऊ विरुद्ध आठ असे काठावरचे बहुमत आहे.

नगरपंचायतीवर राजकीय फेरबदलांमुळे मोठा परिणाम झाला आहे. राजकीय फेरबदलांमुळे सत्ताधाऱ्यांनी देखील पाठ फिरवल्याने नगरपंचायतीची कामे ठप्प झाली आहेत. सत्ताधारी व विरोधक आपल्या वरिष्ठांच्या मदतीने विकासकामांना खो घाळण्याचे काम करतायत. ते दुजाभाव निर्माण करण्याचे प्रयत्न करतायत असा आरोप आता नगरसेवक करताना दिसत आहेत. तर निधी फक्त आम्हीच आणू शकतो असे जनतेच्या मनावर बिंबवण्यासाठी दोन्ही गटात स्पर्धाच लागलेली आहे.

दरम्यान आता निधीच्या असमान वाटपावरून नगरसेवकांमध्ये असंतोष निर्माण झाला आहे. विकासकामांच्या नावाखाली तर आगामी स्थानिक स्वराज्य संस्थांच्या निवडणुका जवळ आल्याने जो तो आपल्या राजकीय वाटचालीसाठी पक्षप्रवेशावर भर देत आहे. यात आता नवा गट स्थापन करण्याचा ट्रेंड तयार होताना दिसत असून नगरसेवक राजकीय पोळी भाजून घेण्याचा प्रयत्न करतायत.

अशातच एकीकडे आता योगेश कदम यांच्या घोषणेमुळे मंडणगड नगरपंचायतीवर शिंदे सेनेचा भगवा फडण्याची शक्यता निर्माण झाली आहे. तर दुसरीकडे राज्याच्या राजकारणात सत्तेचे वाटेकरी असणारे शिंदेसेना आणि राष्ट्रवादी काँग्रेस जनतेचे हित लक्षात घेऊन राजकारण करणार का? की फक्त ठाकरेंना धक्का देण्यासाठी शिंदे सेनेच्या योगेश कदमांना राष्ट्रवादी काँग्रेस साथ सोडणार का ते आता पाहावं लागणार आहे.