Karad Politics : साहेबांच्या बालेकिल्ल्यात अजितदादांना मिळालाय खमका नेता... उंडाळकरांमुळे 3 तालुक्यात वाढणार बळ!

Karad Politics : राष्ट्रवादी काँग्रेसमध्ये फूट पडल्यानंतर महाराष्ट्रभरातील आमदारांनी, नेत्यांनी उपमुख्यमंत्री अजित पवार यांची साथ दिली. पण काही अपवाद राहिले. यात सातारा जिल्ह्यातील कराड, पाटण आणि कोरेगाव तालुक्यातील बाळासाहेब पाटील, विक्रमसिंह पाटणकर, शशिकांत शिंदे या नेत्यांनी शरद पवार यांच्यासोबतच राहणे पसंत केले.

त्यामुळे या 3 तालुक्यात अजित पवार आणि राष्ट्रवादी काँग्रेसची ताकद क्षीण राहिली होती. नेतेच नसल्याने सहाजिक या तालुक्यातील लोकांचाही राष्ट्रवादीकडे ओढा कमीच राहिला. याची सल अजित पवार यांना होती. अखेर अॅड. उदयसिंह उंडाळकर यांच्या माध्यमातून अजित पवार यांना शरद पवार यांच्या या बालेकिल्ल्यात खमका नेता मिळाला आहे.

काँग्रेसचे दिवंगत नेते, 7 टर्मचे आमदार विलासराव पाटील-उंडाळकर यांचे पुत्र उदयसिंह उंडाळकर यांचा 19 एप्रिल रोजी राष्ट्रवादीमध्ये प्रवेश होणार आहे. त्यांच्या प्रवेशाने साताऱ्याच्या दक्षिण भागातील कराड दक्षिण, उत्तर व पाटण या विधानसभा मतदारसंघातील अजित पवार यांच्या गटाला नवा चेहरा मिळणार आहे.

विलासकाका उंडाळकर यांच्या पश्चात उदयसिंह उंडाळकर यांनी काँग्रेस पक्षात आपला वेगळा ठसा उमटवला. पक्षानेही त्यांच्या कामाची दखल घेत त्यांना राज्य पातळीवरील जबाबदारी दिली. त्यांना प्रदेश चिटणीस बनवले. स्थानिक राजकारणातही रयत सहकारी साखर कारखाना, कोयना बँक, कोयना दूध संघ, जिल्हा बँक या संस्थांच्या माध्यमातून त्यांचा गट आजही जिवंत ठेवला आहे.

कराड, पाटण तालुक्यात या संस्थांच्या माध्यमातून उंडाळकर गटाचा निर्णायक होल्ड आहे. परंतु या गटाला आता सत्तेच्या राजकीय पाठबळाची गरज भासू लागली. ही राजकीय पाठबळाची गरज पूर्ण करण्यासाठी उदयसिंह पाटील यांनी इतर पक्षात जाण्यासंदर्भात विचार सुरु केला. त्याचवेळी फुटीनंतर अजित पवारांकडे या पट्ट्यात गर्दी जमवणारा नेता नव्हता.

या दोन्ही गरजा ओळखून 19 एप्रिल रोजी अजित पवार यांच्या उपस्थितीत उदयसिंह पाटील यांचा पक्षप्रवेश होणार आहे. आता या भागाला पुन्हा राष्ट्रवादीचा बालेकिल्ला बनवण्याच्या प्रयत्नांना कितपत यश येणार? जिल्ह्यात, तालुक्यात राष्ट्रवादी पक्ष वाढवण्याचे शिवधनुष्य अॅड. उदयसिंह पाटील पेलवणार का? याचीच चर्चा सुरू आहे.