Ambedkar meets Fadnavis: ॲड. आंबेडकरांनी घेतली मुख्यमंत्र्यांची भेट; परभणी घटनेच्या संदर्भात केली महत्त्वाची मागणी

Parbhani incident updates : परभणीत एका मनोरूग्णाने 10 डिसेंबरला जिल्हा रेल्वे स्थानकाजवळ असलेल्या संविधान प्रतिकृतीची विटंबना केली. त्यानंतर शहरात हिंसाचार उसळला होता. हिंसाचार झाल्यानंतर पोलिसांनी अनेकांची धरपकड केली. यावेळी न्यायालयीन कोठडीत असलेल्या सोमनाथ सूर्यवंशींचा मृत्यू झाला होता. त्यानंतर वातावरण तापले होते.

या घटनेनंतर काँग्रेसचे नेते राहुल गांधी (Rahul Gandhi) यांच्यासह अनेकांनी सूर्यवंशींच्या कुटुंबाला भेट दिली होती. त्यानंतर आता वंचित बहुजन आघाडीचे राष्ट्रीय अध्यक्ष ॲड. प्रकाश आंबेडकर यांनी शनिवारी सकाळी राज्याचे मुख्यमंत्री देवेंद्र फडणवीस यांची भेट घेतली. या भेटीत त्यांनी परभणी घटनेच्या संदर्भात महत्वाच्या मागण्या केल्या आहेत.

ॲड. प्रकाश आंबेडकर (Prakash Ambedkar) यांनी शनिवारी सकाळी मुख्यमंत्री फडणवीस यांची भेट घेतली. परभणी प्रकरणातील पीडित सोमनाथ सूर्यवंशी यांच्या कुटुंबियांना 1 कोटी रूपयांची भरपाई द्यावी अशीही मागणी ॲड. आंबेडकर यांनी केली. परभणीत पोलिसांनी क्रूरपणे केलेल्या मारहाणीत बळी पडलेल्यांची यादी करून त्यांना पुरेशी भरपाई देण्याची आणि आदिवासी विद्यार्थ्यांसाठी डीबीटी रद्द करण्यासाठी सल्लामसलत करण्यासाठी, सर्वेक्षण करण्याची आमची मागणी मुख्यमंत्री फडणवीस यांनी मान्य केली असल्याचे त्यांनी ट्विटर हँडलवरून स्पष्ट केले.

येथील घटनेच्या निषेधार्थ परभणी बंदची हाक देण्यात आली होती. त्यादरम्यान आक्रमक तरुणांनी वाहनांची, दुकानांची तोडफोड केली. घटनेच्या दोन दिवसानंतर पोलीसांनी 12 डिसेंबर रोजी सोमनाथ याच्यासह 300 लोकांना ताब्यात घेतले होते. तर 72 तासानंतर न्यायालयीन कोठडीत त्याचा मृत्यू झाला.

पोलिसांनी केलेल्या अमानुष मारहाणीत सोमनाथ याचा मृत्यू झाल्याचा आरोप विरोधकांनी केला होता. तर सूर्यवंशीने छातीत दुखत असल्याचे सांगितल्यानंतर त्याला उपचारासाठी रुग्णालयात दाखल केल्याचे आणि त्याचा मृत्यू झाल्याचा दावा पोलिसांनी केला होता. तर सूर्यवंशीच्या शवविच्छेदन अहवालात अनेक जखमा झाल्यामुळे मृत्यू झाल्याचे म्हटले आहे. राज्य शासनाने या प्रकरणात सूर्यवंशीच्या नातेवाईकांना 10 लाख रुपयांची मदत जाहीर केली आहे.