Prakash Mahajan : शिंदे सेनेत गेलेल्या प्रकाश महाजनांकडून भाजप विषयी मोठा 'गौप्यस्फोट'

Prakash Mahajan political statement : “मी भाजपमध्ये का गेलो नाही?” या प्रश्नावर प्रकाश महाजन यांनी केलेला खुलासा सध्या राजकीय वर्तुळात चर्चेचा विषय ठरत आहे. मनसेला रामराम ठोकल्यानंतर त्यांनी एकनाथ शिंदे यांच्या शिवसेनेत प्रवेश केला असून, या निर्णयामागची भूमिका त्यांनी एका विशेष मुलाखतीत मोकळेपणाने मांडली आहे. भाजपमध्ये प्रवेश का झाला नाही, यावर बोलताना त्यांनी ‘एन्ट्रन्स एक्झाम’चे उदाहरण देत सूचक आणि खोचक भाष्य केले.

प्रकाश महाजन म्हणाले की, माणसाचं वय वाढलं तरी त्याला समजावून सांगणारा, रुसवा काढणारा कोणी तरी असावा, हीच माणुसकी आहे. एका मित्राने माझ्यासाठी प्रयत्न केला, भाजपच्या सर्वोच्च नेतृत्वापर्यंत जाऊन “प्रकाश महाजन यांना पक्षात घ्या” असंही सांगितलं. मात्र मी नेमकं कोणासमोर ही गोष्ट मांडली गेली, ते सांगणार नाही. त्या प्रयत्नानंतर मी तब्बल तीन महिने वाट पाहत राहिलो. शेवटी हे लक्षात आलं की काहीच घडणार नाही. या वयात माणसाला एका आधाराची गरज असते, अशी खंत त्यांनी व्यक्त केली.

आधार म्हणजे केवळ आर्थिक मदत असा अर्थ कोणी काढू नये, असंही त्यांनी स्पष्ट केलं. आधार हा भावनिक असतो. मी महाजन आहे, तांब्याभर पाणी पिऊन झोपू शकतो. गरज पडली तर मित्रांकडून पैसे मागू शकतो, पण पैशासाठी कधीच इमान विकू शकत नाही. म्हणूनच दुसऱ्या ठिकाणी गेल्यावर निष्ठा विकली, असं कोणी म्हणू नये. मला असा पक्ष हवा होता, जिथे हिंदुत्वाबाबत विचार जुळतील.

याच शोधात मी एकनाथ शिंदे यांना भेटलो. रात्री साडेबारा वाजता आमची भेट झाली. शिंदे साहेबांनी अत्यंत साध्या आणि स्पष्ट शब्दांत मला सांगितलं की, तुम्ही तुमचं युट्यूब चॅनल सुरू ठेवा, तुमचं मत मोकळेपणाने मांडा. फक्त बाळासाहेब ठाकरे आणि आनंद दिघे यांची विचारधारा जपा आणि बोलताना सभ्य भाषा वापरा. हा कानमंत्र मला महत्त्वाचा वाटला, असं महाजन म्हणाले.

राज ठाकरे यांच्याबद्दल बोलताना त्यांनी भावनिक पण थेट भूमिका घेतली. एकेकाळी ज्यांना आपण विठ्ठल मानलं, तो विठ्ठल आता संपला आहे, अशी भावना त्यांनी व्यक्त केली. मनसेपासून दूर जाण्याचा निर्णय सोपा नव्हता, पण परिस्थिती आणि अनुभवांनी तो घ्यावा लागला, असंही त्यांनी नमूद केलं.