Mahadevi Elephant Case : 'महादेवी'ला  'वनतारा'ला पाठवण्यासाठी दोन कोटींची ऑफर..., राजू शेट्टींनी 'पेटा'च्या अधिकाऱ्याचं नाव घेतलं

Raju Shetti News : कोल्हापुरातील नांदणी मठातील महादेवी हत्तीणीची रवानगी गुजरातमधील अंबानींच्या वनतारा प्राणी कल्याण प्रकल्पात रवानगी करण्यात आली आहे. त्यामुळे मोठे राजकारण पेटले आहे. नांदमी ग्रामस्थ एकवटले असून जिओवर बहिष्कार घालत आहेत. पेटाने पुढाकर घेत महादेवीला वनतारामध्ये हलवले. त्यावरून माजी खासदार राजू शेट्टी यांनी पाच वर्षांपूर्वीच फोटो दाखवत गंभीर आरोप केला आहे.

राजू शेट्टी यांनी सोशल मीडियावर पोस्ट करत म्हटले आहे की, 'पेटा'च्या पदाधिकारी खुशबू गुप्ता यांनी माझी 2020 साली माझ्या जयसिंगपूर येथील कार्यालयात येऊन भेट घेतली होती. त्यावेळेस त्यांनी नांदणी मठाचे भट्टारक महाराज आणि विश्वस्त यांची समजूत घाला व माधुरी (महादेवी) हत्ती अंबानी यांच्या नव्याने होत असलेल्या वनतारा या खासगी प्राणि संग्रहालयात पाठवून द्या अशी विनंती केली.

'या हत्तीच्या बदल्यात अंबानी उद्योग समुहाकडून २ कोटी रूपयाची देणगी नांदणी मठास देण्याचा प्रस्ताव त्यांनी मला दिला. भट्टारक महाराज व विश्वस्त यांच्याशी चर्चाही न करता तो प्रस्ताव मी फेटाळून लावला अखेर पेटाने खोटे आरोप व चुकीचे कागदपत्रे तयार करून माधुरी हत्तीला घेऊन गेले. पण माधुरीला परत आणल्याशिवाय मी स्वस्थ बसणार नाही.', असे राजू शेट्टी यांनी म्हटले आहे.

वनतारातील 'तो' फोटो दाखवला

नांदणी मठामध्ये माधुरी (महादेवी) हत्ती ३३ वर्षे साखळदंडाने बांधून सदर हत्तीच्या पायाला जखमा झाल्या असल्याचा आरोप पेटाने केला आहे. त्यावरून राजू शेट्टी यांनी वनतारामध्ये पायाला साखळदंड बांधलेल्या हत्तीचे फोटे शेअर करत म्हटले आहे की, अंबानीच्या वनतारा येथे हत्तीच्या पायाला बांधून ठेवण्यात आलेले आहे. मग हे हत्ती कसे मुक्त संचार करतात याचा खुलासा पेटाने करावा त्याचबरोबर वनतारामधील हत्ती अंबानी कुटूंबाच्या कार्यक्रमात राजरोसपणे कोणत्या नियमान्वये वापरले जातात ? याचा खुलासा वनतारामधील अधिका-यांनी नांदणी मठामध्ये करावा , तसेच आजपर्यंत वनतारामध्ये किती प्राणी आले ? किती दगावले ? याचाही लेखा-जोखा द्यावा.