NCP Politics : ऐन निवडणुकीच्या तोंडावर 'या' तीन जिल्ह्यातील बड्या नेत्यांनी शरद पवारांची साथ सोडली...

Sharad Pawar Ncp : जेष्ठ नेते शरद पवार यांच्या राष्ट्रवादी काँग्रेसच्या बुलढाणा, हिंगोली आणि अहमदनगरच्या जिल्हाध्यक्षांनी अचानक आपल्या पदाचा राजीनामा दिला आहे. या जिल्हाध्यक्षांनी राजीनामा दिल्यामुळे ऐन स्थानिक स्वराज्य संस्थांच्या निवडणुकीच्या तोंडावर शरद पवारांच्या राष्ट्रवादीला मोठं खिंडार पडलं आहे.

महत्वाची बाब म्हणजे राष्ट्रवादी पक्षाचे दोन गट तयार झाल्यानंतर या नेत्यांनी शरद पवार यांच्यासोबत राहण्याचा निर्णय घेतला होता. मात्र, आता निवडणुकीच्या तोंडावर त्यांनी कौटुंबिक कारण देत पक्षाला सोडचिठ्ठी दिली आहे. त्यामुळे हा पवारांसाठी मोठा धक्का मानला जात आहे.

हिंगोलीचे जिल्हाध्यक्ष दिलीप चव्हाण, बुलढाण्याचे जिल्हाध्यक्षा रेखा खेडेकर आणि अहमदनगरचे जिल्हाध्यक्ष राजेंद्र फाळके या तिघांनी आपल्या पदाचा राजीनामा दिला आहे. बुलढाण्याच्या चिखली मतदारसंघाच्या माजी आमदार पवारांच्या राष्ट्रवादीच्या जिल्हाध्यक्षा रेखा खेडेकर यांनी वैयक्तिक कारणांमुळे राजीनामा देत असल्याचे प्रदेशाध्यक्ष शशिकांत शिंदे यांना पत्राद्वारा कळवलं आहे.

मात्र, ऐन निवडणुकांच्या तोंडावर त्यांनी राजीनामा दिल्याने बुलढाण्यातील कार्यकर्त्यांमध्ये संभ्रमाचं वातावरण निर्माण झालं आहे. तर तिकडे हिंगोलीचे जिल्हाध्यक्ष दिलीप चव्हाण यांच्यासह अनेक नगरसेवकांनी मुंबईमध्ये उपमुख्यमंत्री अजित पवारांच्या उपस्थितीत राष्ट्रवादी काँग्रेसमध्ये (अजित पवार) प्रवेश केला आहे.

दरम्यान, नगरचे जिल्हाध्यक्ष राजेंद्र फाळके यांच्याकडे सात वर्ष पक्षाचं जिल्हाध्यक्ष पद होतं. मात्र, आता त्यांनी कौटुंबिक करण सांगत तडकाफडकी राजीनामा दिला आहे. या तिन्ही नेत्यांच्या राजीनाम्यामुळे शरद पवारांच्या राष्ट्रवादीला धक्का बसल्याचं बोललं जात आहे.