Ladki Bahin Yojana : बहिणींनो, आनंदाची बातमी! निवडणूक जिंकली, आता शब्द पाळणार लाडकी बहीण योजनेच्या 2100 रुपयांबाबत शिंदेंचा मोठा खुलासा!

राज्यातील महिलांसाठी दिलासादायक आणि आनंदाची बातमी समोर आली आहे. नगरपरिषद आणि नगरपंचायत निवडणुकांचे निकाल जाहीर झाल्यानंतर उपमुख्यमंत्री एकनाथ शिंदे यांनी ‘मुख्यमंत्री माझी लाडकी बहीण’ योजनेबाबत मोठे वक्तव्य केले आहे. या योजनेअंतर्गत लाभार्थी महिलांना दिला जाणारा आर्थिक हप्ता लवकरच त्यांच्या खात्यात जमा केला जाईल, असे त्यांनी स्पष्ट केले. लाडक्या बहिणींना 2100 रुपयांचा हप्ता देण्याचा निर्णय ठाम असून ही योजना कोणत्याही परिस्थितीत बंद होणार नाही, असा विश्वासही त्यांनी व्यक्त केला.

निवडणुकांमध्ये मिळालेल्या यशानंतर एकनाथ शिंदे यांनी राज्यातील महिलांचे अभिनंदन केले. माध्यमांशी संवाद साधताना त्यांनी सांगितले की, ही योजना त्यांच्या अत्यंत जिव्हाळ्याची आहे. सुरुवातीपासूनच अनेकांनी या योजनेवर टीका केली, अडथळे निर्माण करण्याचा प्रयत्न केला, मात्र सरकारने ठाम भूमिका घेत योजना सुरूच ठेवली. लाडक्या बहिणींच्या सन्मानासाठी सुरू केलेली ही योजना बंद करण्याची ताकद कुणातही नाही, असेही त्यांनी स्पष्ट शब्दांत सांगितले.

महिलांच्या आर्थिक सबलीकरणासाठी ही योजना अत्यंत महत्त्वाची ठरली आहे. घरखर्च, आरोग्य, शिक्षण यांसारख्या गरजांसाठी या मदतीचा मोठा उपयोग होत असल्याचे अनेक लाभार्थींनी सांगितले आहे. सरकार महिलांच्या पाठीशी ठामपणे उभे असून योग्य वेळ येताच सन्मान निधीच्या रकमेत वाढ करण्याचाही विचार केला जाईल, असे संकेत उपमुख्यमंत्र्यांनी दिले.

दरम्यान, लाडक्या बहिणींसाठी आणखी एक महत्त्वाची माहिती समोर आली आहे. लवकरच त्यांच्या खात्यात एकत्रित रक्कम जमा होण्याची शक्यता आहे. सध्या राज्यात स्थानिक स्वराज्य संस्थांच्या निवडणुकांची प्रक्रिया सुरू असल्याने आचारसंहितेच्या कालावधीतच योजनेचा हप्ता वितरित करण्यासाठी हालचाली सुरू झाल्या आहेत. मिळालेल्या माहितीनुसार महिलांना तीन महिन्यांचे अनुदान एकत्र दिले जाऊ शकते.

यामुळे लाडक्या बहिणींच्या खात्यात 4500 रुपयांची रक्कम जमा होण्याची शक्यता वर्तवली जात आहे. येत्या 14 जानेवारीपूर्वी दोन हप्त्यांची रक्कम एकत्र देण्याचा सरकारचा प्रयत्न असल्याचे समजते. त्यामुळे राज्यातील लाखो महिलांना नववर्षाच्या सुरुवातीलाच आर्थिक दिलासा मिळणार असून या योजनेमुळे त्यांच्या जीवनात सकारात्मक बदल घडत असल्याचे चित्र दिसून येत आहे.