Deputy Sarpanch murder case : 4 वर्षांपासूनचा राग डोक्यात; जळगावात माजी उपसरंपचाच्या हत्येचे गूढ उलगडले...

Jalgaon News : मस्साजोग (बीड) सरपंच संतोष देशमुख यांची हत्या चर्चेत असतानाच जळगाव जिल्हा माजी उपसरपंचाच्या हत्येने हादरला होता. युवराज कोळी (रा. कानसवाडे) असे त्यांचे नाव होते. शुक्रवारी (21 मार्च) सकाळी अतिशय निर्घृण पद्धतीने हा खून झाल्याचे समोर आले होते. तिघांनी धारदार शस्त्रांनी त्यांची हत्या केली होती. त्यानंतर आता या हत्येचे नेमके कारण समोर आले आहे. बिअर बारच्या वादातून ही हत्या झाल्याचे उघडकीस आले आहे.

कानसवाडे गावात भरत भास्कर पाटील आणि मुलगा परेश यांचा धनाई परमिट रूम आणि बियर बार आहे. 2021 मध्ये कोळी उपसरपंच होते. कोरोनाच कालावधीत निर्बंध असतानाही पाटील बिअर बार उशिरापर्यंत सुरू ठेवत होते. नियमांचे पालन करत नव्हते. याबाबत कोळी यांनी उपसरपंच म्हणून त्यांना वारंवार समज दिली होती. त्यानंतर या वादातूनच कोळी आणि पाटील यांच्यात जोरदार भांडण देखील झाले होते.

यावेळी पाटील यांनी गावात गटारी आणि रस्ते केले जात नाहीत अशी तक्रार करीत वाद घातला. त्याच वेळेस त्यांनी तुला जिवंत ठेवणार नाही अशी धमकी दिली होती. हाच राग डोक्यात ठेवून युवराज कोळी आणि त्यांचे वडील शेतात काम करत असताना बियर बारचे मालक भरत भास्कर पाटील आणि त्यांचा मुलगा परेश यांसह भाऊ देवेंद्र उर्फ देवा पाटील यांनी त्यांना गाठले.

यावेळी वाद करत त्यांनी धारदार शस्त्राने युवराज कोळी याच्यावर हल्ला चढवला. यात ते गंभीर जखमी झाले. यावेळी जवळच्या शेतात काम करणारे लोकही धावून आले. यावेळी पाटील हे पळून गेले. त्यांचा पाठलाग करण्यात आला. मात्र ते हाती लागले नाहीत. या प्रकारानंतर गावात मोठ्या संख्येने नागरिक जमले. परिसरात तणावाचे वातावरण होते.

संतप्त गर्दीने धनाई परमिट रूमची मोडतोड केली. तेथे असलेली पाटील यांची मोटरसायकल देखील जाळून टाकण्यात आली. पोलिसांनी फरारी झालेल्या आरोपींचा शोध अतिशय गांभीर्याने सुरू केला आहे. त्यासाठी दोन पथके रवाना झाली आहेत. त्यांच्या लपण्याचे ठिकाण पोलिसांना कळल्याचे बोलले जाते. लवकरच त्यांना अटक करण्यात येईल, असे वरिष्ठ अधिकाऱ्यांनी सांगितले.