SIT Probe: जरांगेंच्या ऑडियो क्लीपचा तपास धडाकेबाज IPS अधिकाऱ्याकडं! अंतरवालीतील लाठीचार्जनंतर दिली होती जालन्याची धुरा, कोल्हापूर-पुण्यातही केलंय काम

Shailesh Balkawade : मराठा आंदोलक मनोज जरांगे यांनी समोर आणलेल्या ऑडिओ क्लीपनं राज्याच्या राजकारणात धमाका केला आहे. यामुळं महायुतीत भडका उडाला असून शिवसेना आणि भाजप एकमेकांकडं संशयाच्या नजरेनं पाहत आहेत. यापार्श्वभूमीवर या ऑडिओ क्लीपची सत्यता पडताळण्यासाठी आणि या प्रकरणाच्या मुळाशी जाण्यासाठी आता विशेष तपास पथकाची स्थापना करण्यात आली आहे. याची धुरा धडाकेबाज IPS अधिकारी शैलेश बलकवडे यांच्याकडं सोपवण्यात आली आहे.

गेल्या सहा दिवसांपासून जरांगेंनी समोर आणलेल्या या ऑडिओ क्लीपवर घमासान चर्चा सुरु आहे. ही क्लीप बाहेर आल्यापासून त्याची फॉरेन्सिक तपासणी करण्याची मागणी या प्रकरणाशी संबंधित सर्वच घटकांकडून केली जात आहे. यामध्ये स्वतः मनोज जरांगे, एकनाथ शिंदेंची शिवसेना आणि भाजपचे नेते या सर्वांनी ही मागणी केली होती.

महायुतीतल्या शिवसेना आणि भाजपमधील आपसांत सुरु झालेल्या आरोप-प्रत्यारोपांच्या पार्श्वभूमीवर अखेर आज मुख्यमंत्र्यांनी एसआयटीमार्फत या ऑडिओ प्रकरणाचा तपास केला जाईल अशी घोषणा केली. या एसआयटीमध्ये अपर पोलीस आयुक्त, शैलेश बलकवडे (अध्यक्ष) आणि विजयकांत सागर, बजरंग बनसोडे या दोन सदस्यांचा समावेश आहे, अशी ही त्रिसदस्यीय समिती आहे.

आंतरवलीत परिस्थिती आणली पूर्वपदावर

दरम्यान, जालना जिल्ह्यातील अंतरवाली सराटी इथं सप्टेंबर २०२३ रोजी मनोज जरांगेंच्या आंदोलनावर लाठीचार्जची कारवाई करणारे जालन्याचे तत्कालीन पोलीस अधीक्षक तुषार दोषी यांना सक्तीच्या रजेवार पाठवण्यात आलं होतं. त्यानंतर शैलेश बलकवडे यांनी त्यांच्या जागेचा पदभार स्विकारला होता. त्यानंतर त्यांनी आंतरवलीत जाऊन परिस्थितीचा आढावा घेत मतभेद दूर करण्याचं काम केलं होतं.

भारत सरकारचं शौर्यपदक

शैलेश बलकवडे हे अत्यंत कडक शिस्तीचे अधिकारी म्हणून ओळखले जातात. यापूर्वी त्यांनी गोंदिया, नागपूर, पुणे, कोल्हापूर आणि गडचिरोली पोलीस अधीक्षक म्हणून काम पाहिलं आहे. गडचिरोलीत नक्षलविरोधी कारवाईत त्यांनी उल्लेखनीय कार्य केलं होतं. या कामगिरीसाठी त्यांना भारत सरकारचे शौर्यपदकही मिळालं आहे. विशेष म्हणजे शैलेश बलकवडे यांच्या पत्नी कादंबरी बलकवडे या IAS अधिकारी आहेत.