Santosh Deshmukh Murder : "हात हलवत परत आलास, आमची इज्जत घालवलीस" : विष्णू चाटेने केलेल्या अपमानाने घुले पेटला

बीड : मस्साजोगचे सरपंच संतोष देशमुख यांच्या हत्या प्रकरणात चार्जशीट दाखल झाल्यानंतर रोज नवे खुलासे होत आहेत. या चार्जशीटमध्ये वाल्मिक कराडला हत्येचा मास्टरमाईंड ठरविण्यात आले आहे. यामागे अनेक पुरावे आणि जबाब याचा आधार पोलिसांनी घेतला आहे. यात तिरंगा हॉटेलमध्ये उपस्थित असलेल्या गोपनीय साक्षीदाराचा जबाब अत्यंत महत्वपूर्ण ठरला. कारण याच बैठकीमध्ये संतोष देशमुख यांची हत्या करण्याचा कट रचला गेल्याचे सांगण्यात येते.

काय घडले होते तिरंगा हॉटेलमध्ये?

6 डिसेंबर 2024 रोजी मस्साजोग येथील भांडणाचा व्हिडीओ व्हायरल झाला. त्यात सुदर्शन घुले (Sudarshan Ghule) दिसत होता. त्यानंतर 8 डिसेंबर 2024 रोजी घुले आणि अन्य एक जण टाकळी गावात भेटले. यावेळी घुले याने विष्णू चाटे याचा फोन आला होता, त्याने आपल्याला तिरंगा हॉटेलमध्ये जेवायला बोलावले आहे, असे त्या व्यक्तीला सांगतिले. चाटे तिथे आधीच येऊन बसला होता. जेवताना चाटेने घुलेला चांगलेच झापले.

"तुला प्लॉट बंद करायला पाठवले होते, तो तुम्ही बंद केला नाही, उलट हात हलवत परत आलास. आम्ही कमवायचे आणि तुम्ही वाटोळे करायचे. स्वत:ची पण आणि आमची पण इज्जत घालवलीस," असे चाटे (Vishnu Chate) म्हणाला. त्यावर "आम्ही कंपनी बंदच करायला गेलो होतो. पण तिथं तो देशमुख मध्ये आला. त्याने कंपनी बंद करून दिली नाही. काय करायचं, असा सवाल घुलेने विचारला.

यावर चाटेने वाल्मिक कराडचा निरोप दिला. "वाल्मिक अण्णांचा निरोप आहे की, कामही बंद केले नाही. पैसे पण दिले नाहीत. आता संतोष देशमुख आडवा येत असेल आला तर त्याला कायमचं आडवं करा. याच निरोपानंतर घुले पेटून उठला. त्याने सुधीर सांगळे, कृष्णा आंधळे, महेश केदार, प्रतिक घुले आणि जयराम चाटे यांना सोबत घेतलं. दुसऱ्याच दिवशी सहा जणांनी संतोष देशमुख यांना गाठलं, त्यांचं अपहरण केलं आणि निर्घृण हत्याही केली.

याच चर्चेवेळी तिथे उपस्थित असलेल्या तिसऱ्या गोपनीय व्यक्तीने पोलिसांना जबाब दिला आहे. त्यामुळे वाल्मिक कराड याचा विष्णू चाटेला निरोप, विष्णूचे सुदर्शन घुलेले आदेश आणि त्यानंतर देशमुख यांची झालेली हत्या या सगळ्या कड्या पोलिसांनी जुळवल्या आहेत.

25 वर्षे पूर्ण करणारा ई-सकाळ आता कॉमस्कोअरमध्ये नंबर 1. डिजिटल माध्यमांच्या क्षेत्रातली नवी झेप