Supriya Sule : विधानसभेच्या निकालावर सुप्रिया सुळेंची पहिली प्रतिक्रिया, म्हणाल्या 'आम्ही पराभूत झालो असलो...'

Supriya Sule News : विधानसभा निवडणुकीत महाविकास आघाडीला मोठा फटका बसला आहे. महाविकास आघाडीतील तीनही मित्र पक्ष मिळून अवघ्या 49 जागांवर पोहोचले आहेत. तर, महायुतीने 230 पेक्षा अधिक जागा मिळवल्या आहेत. महायुतीच्या या ग्रँड विजयावर खासदार सुप्रिया सुळे यांनी ट्विटरवरून आपली प्रतिक्रिया दिली आहे.

सुप्रिया सुळे म्हणाल्या आहेत की, विधानसभा निवडणुकीत मायबाप जनतेने जो कौल दिला तो अतिशय नम्रपणे आम्ही स्वीकारत आहोत. या निकालातून बोध घेऊन नक्कीच आत्मपरीक्षण करू आणि भविष्यातील सक्षम महाराष्ट्र उभा करण्यासाठी प्रामाणिकपणे लढत राहू.

आपल्या ट्विटमध्ये सुप्रिया सुळे यांनी म्हटले आहे की, 'शेतकरी, कष्टकरी, महिला, तरुण व समाजातील प्रत्येक घटकांच्या हक्काची व स्वाभिमानाची लढाई आम्ही खंबीरपणे कायम लढत राहू. आता जरी आम्ही पराभूत झालो असलो तरी आपल्या मूल्यांसाठी प्रांजळपणे काम करत राहू आणि शिव-शाहू-फुले-आंबेडकरांच्या विचारांची ही पालखी निष्ठेने, सर्व शक्तीनिशी पुढे नेऊ. '

या निवडणुकीत विजयी झालेल्या सर्वांचे हार्दिक अभिनंदन. महाराष्ट्रातील जनतेच्या हितासाठी आपण काम कराल ही अपेक्षा आहे, असे देखील सुळे यांनी आपल्या ट्विटमध्ये म्हटले आहे.

मी घरी बसणार नाही...

शरद पवार यांनी देखील विधानसभा निवडणुकीवर प्रतिक्रिया दिली आहे. ते म्हणाले, या निकालाचा अभ्यास करून त्याची कारणमीमांसा करू.काल निकाल लागला आज मी कऱ्हाडमध्ये आहे. एखादा घरी बसला असता मी घरी बसणारा नाही. आमच्या तरुण पिढीला असा निकाल लागेल असं वाटलं नव्हत. त्यांचा आत्मविश्वास वाढवला पाहिजे.