Pune News: राज्यातील इयत्ता पहिली ते बारावीपर्यंत अध्यापन करणाऱ्या शिक्षकांसाठी सुरू करण्यात आलेल्या ‘शिक्षकांसाठी AI साथी’ या ऑनलाइन कोर्सला सरकारकडून मुदतवाढ देण्यात आली आहे. यापूर्वी या कोर्समध्ये प्रवेश घेण्याची अंतिम मुदत ३१ ऑगस्ट २०२६ होती. आता ती वाढवून ३० सप्टेंबर २०२६ करण्यात आली आहे. तसेच कोर्स पूर्ण करण्यासाठी ३१ ऑक्टोबर २०२६ पर्यंत मुदत देण्यात आली आहे.
राज्य शैक्षणिक संशोधन व प्रशिक्षण परिषद, महाराष्ट्र (SCERT) यांनी याबाबत सूचना जारी केल्या आहेत. राज्यातील इयत्ता पहिली ते बारावीपर्यंत अध्यापन करणाऱ्या सर्व शिक्षकांनी निर्धारित कालावधीत या कोर्समध्ये प्रवेश घेऊन तो पूर्ण करावा, अशा सूचना संबंधित शिक्षण विभाग आणि शाळांना देण्यात आल्या आहेत.
या ऑनलाइन कोर्सच्या माध्यमातून शिक्षकांना **कृत्रिम बुद्धिमत्ता (AI) आणि मशीन लर्निंगच्या मूलभूत संकल्पना समजावून सांगण्यात येणार आहेत. शिक्षण क्षेत्रात AI चा नेमका कसा उपयोग करता येईल, AI आधारित विविध साधनांचा प्रभावी वापर कसा करावा, तसेच AI चा जबाबदार, सुरक्षित आणि नैतिक वापर कसा करावा, याबाबत मार्गदर्शन करण्यात येते.
दैनंदिन शैक्षणिक तसेच प्रशासकीय कामकाजामध्ये AI चा प्रभावी वापर आणि त्याचा समावेश करण्याच्या पद्धतीही या प्रशिक्षणातून समजावून देण्यात येणार आहेत. त्यामुळे बदलत्या तंत्रज्ञानाच्या पार्श्वभूमीवर शिक्षकांना AI च्या वापराबाबत मूलभूत कौशल्ये मिळण्यास मदत होणार आहे.
राष्ट्रीय शिक्षण धोरण २०२० नुसार प्रत्येक शिक्षकाने दरवर्षी ५० तासांचे सतत व्यावसायिक विकास (CPD) प्रशिक्षण पूर्ण करणे अपेक्षित आहे. त्यानुसार ‘शिक्षकांसाठी AI साथी’ या ऑनलाइन कोर्ससाठी ४ तासांचे CPD प्रशिक्षण श्रेय निश्चित करण्यात आले आहे.
त्यामुळे AI विषयातील प्रशिक्षणासोबतच शिक्षकांच्या व्यावसायिक विकासाच्या दृष्टीनेही हा कोर्स महत्त्वाचा ठरणार आहे.
स्मार्टफोनवरून हा कोर्स पूर्ण करण्यासाठी शिक्षकांनी प्रथम Google Play Store वरून DIKSHA App डाउनलोड करून त्यामध्ये नोंदणी करावी. त्यानंतर प्रोफाइलमधील आवश्यक माहिती भरावी. संबंधित पदनाम उपलब्ध नसल्यास त्याच्या सर्वाधिक जवळचे पदनाम निवडण्याच्या सूचना देण्यात आल्या आहेत. प्रोफाइल पूर्ण केल्यानंतर DIKSHA Courses App डाउनलोड करून त्यामध्ये कोर्ससाठी प्रवेश घ्यावा.
लॅपटॉप किंवा डेस्कटॉपवरून कोर्स पूर्ण करू इच्छिणाऱ्या शिक्षकांनी DIKSHA संकेतस्थळावर लॉगिन किंवा नोंदणी करावी. यापूर्वी DIKSHA App वर त्याच ई-मेल आयडीने नोंदणी केली असल्यास त्याच लॉगिनद्वारे प्रवेश करता येणार आहे.
लॉगिन केल्यानंतर ‘DIKSHA Courses’ या पर्यायावर क्लिक करून ‘AI Saathi for Educators’ किंवा ‘शिक्षकांसाठी AI साथी’ हा कोर्स शोधता येईल. ‘Explore Courses’ आणि ‘Filter Courses’ मधील ‘Maharashtra’ बोर्डाचा पर्याय निवडल्यानंतरही हा कोर्स उपलब्ध होईल.
शिक्षकांनी कोर्स यशस्वीपणे पूर्ण केल्यानंतर मिळणारे प्रमाणपत्र डाउनलोड करून जतन करावे , अशा सूचनाही देण्यात आल्या आहेत. संबंधित क्षेत्रातील सर्व शाळांमधील शिक्षकांकडून निर्धारित कालावधीत हा कोर्स पूर्ण करून घेण्यासाठी आवश्यक कार्यवाही करण्याचे निर्देश देण्यात आले आहेत.
कोर्समध्ये प्रवेशाची अंतिम तारीख : ३० सप्टेंबर २०२६
कोर्स पूर्ण करण्याची अंतिम तारीख : ३१ ऑक्टोबर २०२६
CPD प्रशिक्षण श्रेय : ४ तास
लाभार्थी : इयत्ता १ ली ते १२ वीपर्यंत अध्यापन करणारे शिक्षक
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.