Narayan Rane : नाचता येईना अंगण वाकडे..! विजयी मेळाव्यावरून नारायण राणे ठाकरेंवर बरसले

Narayan Rane’s Strong Reaction Against the Rally : हिंदी सक्तीचे दोन्ही जीआर राज्य सरकारने रद्द केल्यानंतर उद्धव ठाकरे आणि राज ठाकरे यांनी विजयी सभेची घोषणा केली आहे. सक्तीविरोधातील मोर्चाऐवजी 5 तारखेलाच ही विजयी सभा होणार आहे. त्यामुळे दोन्ही बंधू एकत्र येणारच, यावर शिक्कामोर्तब झाले आहे. त्यावरून आता विरोधकांकडून टीका सुरू झाली आहे.

भाजप नेते खासदार नारायण राणे यांनीही या सभेवरून टीका केली आहे. तसेच त्यांनी उद्धव ठाकरेंवरही प्रश्नांची सरबत्ती करत टोला लगावला आहे. उद्धव ठाकरे यांचे मराठीचे प्रेम बेगडी, राजकीय व स्वार्थापोटी असल्याची टीका राणेंनी सोशल मीडियातून केली आहे. मुख्यमंत्री असताना हे प्रेम कुठे गेले होते, असे सवाल त्यांनी केला आहे.

मराठी माणसाच्या नोकरी, धंदा व पोटाच्या प्रश्नासाठी काय केले? मराठीच्या नावावर केवळ आपले कल्याण करून घेतले. मराठी माणसाच्या व मराठी भाषिकांच्या कल्याणाचे काय? महाराष्ट्राची राजधानी मुंबईमध्ये मराठी माणसाची टक्केवारी 18 टक्क्यांपर्यंत खाली आली, याला जबाबदारी कोण? मराठी बद्दल इतके प्रेम होते तर मुलांना इंग्रजी माध्यमात का शिकवले?, असे प्रश्न राणेंनी उद्धव ठाकरेंना केले आहेत.  

सरकारने दोन जीआर रद्द केले म्हणून विजयी मेळावा काढणे म्हणजे नाचता येईना अंगण वाकडे, असेच म्हणावे लागेल, असा टोलाही नारायण राणेंनी दोन्ही ठाकरेंना लगावला आहे. दरम्यान, हिंदी सक्तीविरोधात 5 जुलैला मुंबईत मोर्चा काढण्यात येणार होता. त्याआधीच रविवारी सरकारने दोन्ही जीआर रद्द केल्याने हा मोर्चाही रद्द करण्यात आला. पण त्याऐवजी आता विजयी सभा घेतली जाणार आहे.

राज्य सरकारने नरेंद्र जाधव यांच्या अध्यक्षतेखाली एक समिती स्थापन करण्याचा निर्णय घेतला आहे. पण या समितीचा अहवाला काहीही आला तरी इयत्ता पहिली ते पाचवीपर्यंत हिंदी शिकवण्याचा निर्णय होऊ देणार नाही, असा इशारा राज ठाकरेंनी सोमवारी पत्रकार परिषदेतून दिला आहे. मराठीशी तडजोड खपवून घेणार नाही, असा इशारा ठाकरेंनी दिला आहे.