Ravindra Chavan BJP : मुंबईहून भाजप कार्याध्यक्षांचा फोन अन् मंडल अध्यक्षाच्या निवडीला स्थगिती; विखे समर्थकाची कोणी केली तक्रार?

Ahilyanagar BJP : राज्यभरात भाजप मंडल अध्यक्षपदाच्या निवडी सुरू आहेत. यासाठी पक्षातंर्गत निवडणुका सुरू आहेत. स्थानिक स्वराज्य संस्थांच्या निवडणुकीच्या पार्श्वभूमीवर या नियुक्तींना महत्त्व प्राप्त झालं आहे. पद खेचून घेण्यासाठी पक्षातंर्गत पदाधिकाऱ्यांमध्ये रस्सीखेच सुरू असून, कुरघोड्या रंगल्या आहेत.

भाजपमध्ये एकप्रकारे गटबाजी उफाळली आहे. यातून मंडल अध्यक्षाच्या नियुक्ती पडलेली माळ पक्षाचे कार्याध्यक्ष आमदार रवींद्र चव्हाण यांच्या एका फोननंतर अवघ्या काही तासात काढून घेण्यात आल्याचा प्रकार अहिल्यानगर जिल्ह्यात घडला आहे. पालकमंत्री राधाकृष्ण विखे यांच्या

अहिल्यानगर जिल्ह्यातील शेवगाव-पाथर्डीमधील भाजपच्या (BJP) मंडल अध्यक्षपदांच्या निवडी प्रदेश कार्यालयाच्या आदेशानुसार जाहीर करण्यात आल्या होत्या. शेवगाव मंडलाचे अध्यक्ष म्हणून अमोल सागडे यांची नियुक्ती जाहीर करण्यात आली होती. पदावर संधी मिळाल्याने सागडे आणि त्यांच्या समर्थकांनी उत्साह होता.

अमोल सागडे समर्थक जल्लोष करणार, तेवढ्या पक्षाचे कार्याध्यक्ष आमदार रवींद्र चव्हाण (Ravindra Chavan) यांचा फोन आला अन् नियुक्तीला स्थगिती देण्यात आली. ही सर्व घडामोडी तासाभरातच घडली. त्यामुळे अमोल सागडे यांच्या नावाला विरोध करणारी तक्रार थेट कार्याध्यक्षांकडे कोणी केली याची चर्चा भाजपतंर्गत सुरू झाली आहे.

शेवगाव-पाथर्डी विधानसभा मतदारसंघात शेवगाव, बोधेगाव, पाथर्डी आणि कोरडगाव, अशी चार मंडल आहेत. शेवगावसाठी अमोल सागडे, बोधेगावसाठी संजय टाकळकर, पाथर्डीसाठी धनंजय बडे, कोरडगावसाठी दिंगबर भवर, या चार जणांची नियुक्ती जाहीर करण्यात आली. पण अमोल सागडे यांच्या नियुक्तीला स्थगिती देण्यात आली.

मंडल निवडणूक निर्णय अधिकारी प्रा. भानुदास बेरड यांच्याशी चर्चा केल्यानंतर शेवगावबरोबर श्रीगोंदा विधानसभा मतदारसंघातील वाळकी चिचोंडी पाटील मंडलातील नियुक्तीला देखील स्थगिती देण्यात आल्याची माहिती दिली. ही सर्व कार्यवाही कार्याध्यक्ष आमदार रवींद्र चव्हाण यांच्या आदेशानुसार झाल्याचे प्रा. बेरड यांनी सांगितले. अमोल सागडे हे पालकमंत्री राधाकृष्ण विखे पाटील समर्थक मानले जातात. यातूनच अमोल सागडे यांच्या नियुक्तीला विरोध करण्यात आल्याचे सांगितले जात आहे.