Ashutosh Kale NCP controversy : आंदोलकांची शेरेबाजी, अजितदादाच्या शिलेदाराच्या जिव्हारी; 'तीन हजार कोटी, रस्त्यावर बोटी', 'आमदार काळे, रस्त्यावर तळे'

Kopargaon bad roads issue : कोपरगावमधील रस्त्यांच्या दुरावस्थेवर स्थानिक नागरिक आणि युवक चांगलेच आक्रमक झाले. उपमुख्यमंत्री अजित पवार यांच्या राष्ट्रवादी काँग्रेस पक्षाचे कोपरगावमधील आमदार आशुतोष काळे यांना झोंबेल, अशी आंदोलकांनी शेरेबाजी केली.

'तीन हजार कोटी, रस्त्यावर बोटी...', 'आमदार काळे, रस्त्यावर तळे...', अशा शेरेबाजीने आंदोलकांनी आमदार काळेंना टार्गेट केले. आंदोलकांच्या या शेरेबाजीवर आमदार काळे यांच्याकडून अजून तरी कोणतीही प्रतिक्रिया समोर आलेली नाही.

अहिल्यानगर जिल्ह्यातील कोपरगाव (Kopargaon) शहरातील रस्त्यांची दुरावस्था झाली आहे. याचा नागरिकांना मोठा त्रास सहन करावा लागतो आहे. रस्त्याच्या दुरावस्थेचा बाजारपेठेवर देखील परिणाम झाला आहे. प्रशासनाचे वारंवार लक्ष वेधून देखील रस्त्यांची कामे मार्गी लागली जात नसल्याने रोष व्यक्त केला जात आहे.

या पावसात कोपरगाव शहरातील अक्षरशः चाळण झाली आहे. नागरिकांना पायी चालताना देखील वाट काढणे मुश्लिक होत आहे. या सर्वांचा संताप युवकांनी आंदोलन करत व्यक्त केला. राष्ट्रवादी काँग्रेसचे (NCP) आमदार आशुतोष काळे यांना आंदोलकांनी टार्गेट केले. रस्त्यांवर साचलेल्या खड्ड्यांमधील पाण्यात होडी सोडून त्यात आंदोलकांनी बसून निषेध केला.

आंदोलकांनी यावेळी जोरदार घोषणाबाजी केली. 'तीन हजार कोटी, रस्त्यावर बोटी', 'आमदार काळे, रस्त्यावर तळे', अशा घोषणा देत युवक आंदोलकांनी रस्त्यांची झालेली दुरावस्थेकडे लक्ष वेधले. आमदार काळे यांनी कोपरगावमधील रस्त्यांसाठी तीन हजार कोटी रुपये खर्च केल्याचा दावा केला होता. त्याचा संदर्भ घेत आंदोलकांनी जोरदार शेरेबाजी केली.

रस्त्यावरील खड्ड्यांमध्ये साचलेल्या पाण्यांमध्ये कागदी होड्या सोडत, 'तीन हजार कोटी, प्रवासाला बोटी', 'आमदार काळे, रस्त्यावर तळे', अशा उपरोधिक घोषणा दिल्या. होड्यांबरोबरच रस्त्याच्या कडेला पडलेल्या खड्ड्यात बसून होड्या सोडत एका प्रतिकात्मक मोठ्या होडीवर उपरोधिक संदेश लिहित जोरदार शेरेबाजी केली.

कोपरगावमध्ये विकासाच्या गप्पा मोठ्या, पण नागरिकांना रस्त्यावर बोट चालवण्याची वेळ आली आहे. मोठ्या पर्यटनस्थळी जाण्याची गरज आम्हाला राहिली नसून शहरातच चौका चौकात साचलेल्या तळ्यांमध्ये नौका विहाराचा आनंद आम्ही घेतो, अशी शेरेबाजी करत सत्ताधाऱ्यांच्या कार्यपद्धतीकडे आंदोलकांनी लक्ष वेधले. आंदोलकांनी केलेल्या अनोख्या निषेधामुळे आमदार आणि प्रशासन, रस्त्यांच्या दुरावस्थेची दखल घेणार का? रस्त्यांवरील खड्ड्यांतच कोपरगांवकरांचा पुढील काळात जाणार, हा प्रश्न केला जात आहे.