Ajit Pawar Politics: नाशिकमध्ये अजित पवारच महायुतीत मोठा भाऊ, ७ उमेदवार निश्चित!

Nashik Mahayuti Alliance Candidates: महायुतीमध्ये मोठा भाऊ कोण? यासाठी राज्यात विविध नेत्यांनी दावेदारी केली आहे. नाशिक जिल्ह्यात मात्र उपमुख्यमंत्री अजित पवार यांनी यामध्ये आघाडी घेत महायुतीच्या घटक पक्षांना मागे टाकले आहे.

महायुतीत मोठा भाऊ कोण? याबाबत भाजप सगळ्यात आधी दावा करते. भारतीय जनता पक्षाचे 105 आमदार आहेत. याशिवाय अन्य काही अपक्ष आमदारांनी त्यांना पाठिंबा दिल्याने त्यांची संख्या 113 आहे. त्यामुळे महायुतीच्या जागा वाटपात मुख्यमंत्री एकनाथ शिंदे आणि उपमुख्यमंत्री अजित पवार यांच्यापैकी मोठा भाऊ कोण याबाबत सातत्याने दावे आणि प्रति दावे केले जातात.

जागा वाटपामध्ये राज्यात सर्वाधिक जागांवर भाजपने दावा केला आहे. याबाबत केंद्रीय नेतृत्वाने तसे संकेत चंदीगड येथे झालेल्या बैठकीत दोन्ही उपमुख्यमंत्री आणि मुख्यमंत्री एकनाथ शिंदे यांना दिले आहेत. आता काही जागांवरून या पक्षांच्या नेत्यांत मतभेद आहेत.

हे जागावाटप आज निश्चित होण्याची शक्यता आहे. परवा निवडणुकीची उमेदवारी अर्ज दाखल करण्याची प्रक्रिया सुरू होत आहे. त्यामुळे येत्या दोन दिवसात जागावाटप आणि उमेदवार या दोन्हींबाबत महायुतीच्या नेत्यांना निर्णय घ्यावा लागणार आहे.

स्थिती काहीही असली तरी नाशिक जिल्ह्यात मात्र राष्ट्रवादी काँग्रेस उपमुख्यमंत्री अजित पवार यांचा पक्ष मोठा भाऊ ठरणार हे स्पष्ट झाले आहे. उपमुख्यमंत्री पवार यांनी शनिवारी त्रंबकेश्वर येथे सभा घेऊन प्रचाराला देखील सुरुवात केली आहे.

यावेळी उपमुख्यमंत्री पवार यांनी इगतपुरी मतदारसंघातील काँग्रेस पक्षातून राष्ट्रवादी काँग्रेस अजित पवार गटात दाखल झालेल्या आमदार हिरामण खोसकर यांची उमेदवारी जाहीर केली. याशिवाय राष्ट्रवादी काँग्रेसचे जिल्ह्यात सहा आहेत.

यामध्ये राज्याचे अन्न व नागरी पुरवठा मंत्री छगन भुजबळ (येवला), विधानसभेचे उपाध्यक्ष नरहरी झिरवाळ (दिंडोरी), नितीन पवार (कळवण), माणिकराव कोकाटे (सिन्नर), सरोज अहिरे (देवळाली) आणि दिलीप बनकर (निफाड) हे आमदार आहेत.

पंधरापैकी सात जागांवर उपमुख्यमंत्री पवारांची दावेदारी पक्की मानली जाते. या सर्व सात उमेदवारांनी प्रचार देखील सुरू केला आहे. भारतीय जनता पक्षाला आमदार देवयानी फरांदे (नाशिक मध्य), आमदार सीमा हिरे (नाशिक पश्चिम), आमदार राहुल ढिकले (नाशिक पूर्व), डॉ राहुल आहेर (चांदवड) आणि दिलीप बोरसे (बागलाण) असे पाच आमदार आहेत.

मंत्री दादा भुसे (मालेगाव बाह्य)आणि आमदार सुहास कांदे (नांदगाव)हे दोघे शिवसेना एकनाथ शिंदे गटाचे आमदार आहेत. आता यामध्ये राहिलेली इगतपुरीची जागा देखील अजित पवार यांना मिळाली आहे. अशा स्थितीत मालेगाव शहर ही देखील महायुतीच्या कोणत्याही पक्षाला जागा मिळाली तरी त्यांचा उमेदवार तेथून निवडून येण्याची शक्यता जवळपास अशक्य आहे.

त्यामुळे भाजप शिवसेना युती असताना भाजप आणि शिवसेनेचा जो वरचष्मा होता, तो महायुतीमध्ये उपमुख्यमंत्री पवार यांचा प्रवेश झाल्याने संपुष्टात आला आहे. नाशिकमध्ये आता उपमुख्यमंत्री पवार गटाचे वर्चस्व असणार, हे स्पष्ट झाले आहे. त्यामुळे राज्यात कोणीही असो नाशिक जिल्ह्यात मात्र उपमुख्यमंत्री पवार हेच मोठा भाऊ म्हणून महायुतीत वावरणार आहेत.