तीन तास बसवून ठेवूनही अमित शहांनी खडसेंना भेट दिली नाही : गिरीश महाजनांचा गौप्यस्फोट

जळगाव : केंद्रीय गृहमंत्री अमित शहा (Amit Shah) यांच्या कार्यालयाबाहेर तब्बल तीन तास बसूनही राष्ट्रवादी काँग्रेसचे ज्येष्ठ नेते एकनाथ खडसे (Eknath Khadse) आणि खासदार रक्षा खडसे यांना भेट दिली गेली नाही, असा गौप्यस्फोट भारतीय जनता पक्षाचे नेते तथा ग्रामविकास मंत्री गिरीश महाजन (Girish Mahajan) यांनी केला. ही माहिती आपल्याला खुद्द रक्षा खडसे यांनीच दिली आहे, असा दावाही त्यांनी केला. (Amit Shah did not visit Khadse even after sitting for three hours : Girish Mahajan)

मागील आठवड्यात एकनाथ खडसे हे भाजपचे नेते अमित शहा यांना भेटायला दिल्लीत गेले होते, त्यावेळी शहा यांची खडसे यांच्यासोबत भेट होऊ शकली नव्हती. त्या भेटीबाबत ग्रामविकास मंत्री महाजन यांनी आज गौप्यस्फोट केला.

महाजन म्हणाले की, केंद्रीय गृहमंत्री अमित शहा यांच्या कार्यालयाबाहेर खासदार रक्षा खडसे आणि राष्ट्रवादी काँग्रेसचे नेते एकनाथ खडसे बाहेर बसले आहेत, असा आपल्याला तेथूनच फोन आला होता. त्यावेळी मी माहिती घेतली. रक्षा खडसे यांना विचारले, तेव्हा त्यांनी मला सांगितले की, आम्ही जवळपास तीन तास शहा यांच्या कार्यालयाबाहेर बसलो आहोत. पण, आम्हाला वेळ दिली गेली नाही किंवा भेटायला नकार दिला गेला. त्यामुळे खडसे आणि शहा यांची भेट काही झालेली नाही, एवढं मात्र निश्चित.

एकनाथ खडसे यांच्या मनात काय आहे, हे मला माहिती नाही. पण, भारतीय जनता पक्ष काय निर्णय करतो, हेही महत्वाचे आहे. आतापर्यंत त्यांची भाजपमध्ये २० वर्षे घुसमट होत होती. एवढ्या साऱ्या लाल दिव्याच्या गाड्या, वीस-वीस एवढी सर्व पदांवर असताना घुसमट होत होती. आता राष्ट्रवादीत जाऊन केवळ एकाच वर्षात त्यांची कशी काय घुसमट होऊ लागली, हे मला कळतच नाही. त्यांनी थोडं जरा सबुरीने घेतलं पाहिजे. साईबाबांचा श्रद्धा आणि सबुरी हा संदेश खडसेंनी अंमलात आणावा. त्याचा फायदा त्यांना निश्चितपणे राष्ट्रवादीतही मिळेल, असा सल्लाही गिरीश महाजन यांनी खडसे यांना दिला.