Ahilyanagar Anti Corruption Bureau : तिघांचं लाच घेण्याचं नियोजन, अडकले कारवाईच्या सापळ्यात; दोघांना अटक, तिसरा धाप लागेपर्यंत पळत सुटला!

Parner Panchayat Samiti bribery case : देयक मंजूर करण्यासाठी अधिकाऱ्याने दोन कर्मचाऱ्यांमार्फत लाच स्वीकारल्याचा प्रकारानं खळबळ उडाली. पारनेर नगरपंचायत समितीच्या तिघा अधिकारी-कर्मचाऱ्यांविरोधात ही कारवाई झाली.

यातील दोघांना अटक करण्यात आली असून, तिसरा कारवाई दरम्यान पसार झाला. लाचलुचपत प्रतिबंध विभागाच्या (ACB) अहिल्यानगरमधील पथकाने पोलिस उपअधीक्षक अजित त्रिपुटे यांच्या मार्गदर्शनाखाली ही कारवाई केली.

राज्य सरकारने गाव पातळीवरील शेतीकडे जाणारे रस्ते विकासासाठी 'मातोश्री ग्राम समृद्धी पाणंद रस्ते योजना' सुरू केली आहे. या योजनेसाठी मोठी तरतूद केली आहे. अहिल्यानगर जिल्ह्यात ही योजना मोठ्या प्रमाणात राबवली जात आहे. या कामाचे देयक मंजूर करण्यासाठी 65 हजार 600 रुपयांची लाच घेत असताना पारनेर पंचायत समितीच्या तिघांविरुद्ध गुन्हा दाखल करण्यात आला आहे.

पारनेर (Parner) तालुक्यातील कारेगाव ते वाघोबा रस्ता खडीकरण व मजबुतीकरणाचे एका फर्मला काम मिळाले होते. कामाचे मोजमाप होऊन बिले तयार करून ते मंज़ुरी करता पाठविण्याचे काम रोजगार हमी योजनेचे पॅनल तांत्रिक अधिकारी विलास चौधरी, तांत्रिक सहायक दिनकर मगर, पंचायत समितीचे उपअभियंता अजय जगदाळे यांच्याकडे होते.

यातील विलास चौधरी यांनी बिल मंजुरीसाठी पाठविण्याकरिता स्वतःसह अजय जगदाळे व इतर तिघांकरिता, असे सर्वांचे मिळून 65 हजार 600 रुपये लाचेची मागणी केली. त्यामुळे संबंधित फर्मने लाचलुचपत विभागाच्या अहिल्यानगरमधील पथकाकडे तक्रार केली. पथकाने लाच मागितल्याच्या तक्रारीची 18 नोव्हेंबरला पंचासमक्ष पडताळणी केली. पथकाला तक्रारीत तथ्य आढळले.

यानंतर लाचलुचपत विभागाच्या अहिल्यानगरमधील पथकाने पारनेर पंचायत समिती कार्यालयात सापळा लावला. विलास चौधरी यांनी स्वतः करिता, अजय जगदाळे आणि दिनकर मगर यांच्यासाठी पंचासमक्ष 65 हजार 600 रुपयांची लाच स्वीकारली. संबंधित आरोपींवर गुन्हा दाखल करण्यात आला आहे. ही कारवाई सुरू असतानाच, तिघांपैकी एक जण पसार झाला. हा असा पसार झाला की, त्याला धाप लागेपर्यंत पळत होता, अशी चर्चा होती. या कारवाईने जिल्हा परिषदेच्या वर्तूळातही खळबळ उडाली आहे.