Dhule Cash Controversy News : विधीमंडळ अंदाज समितीचे प्रमुख, शिवसेना एकनाथ शिंदे पक्षाचे आमदार अर्जुन खोतकर हे धुळे दौऱ्यावर असताना त्यांचे स्वीय सहाय्यक अनिल पाटील यांच्या कक्षात 1. 84 कोटी रुपयांची रोकड सापडली होती. याबाबत शिवसेना उद्धव ठाकरे पक्षाचे नेते माजी आमदार अनिल गोटे यांनी स्टिंग ऑपरेशन केले होते. त्यांच्या समर्थकांनी विश्रामगृहावर टेहळणी करीत हा प्रकार उघडकीस आणला होता.
या प्रकरणी पोलिस अधीक्षक देवरे यांनी 15 दिवस या प्रकरणाची चौकशी केली. विश्रामगृहाचे सीसीटीव्ही फुटेज जप्त करण्यात आले होते. प्राप्तिकर विभागाचे तपास अधिकारी स्वामी यांना ही माहिती देण्यात आली. मात्र शेवटी अदखलपात्र गुन्हा दाखल करण्यात आला होता. त्यामुळे येवढ्या गंभीर प्रकरणात अदखलपात्र गुन्हा दाखल झाल्याने आश्चर्य व्यक्त करण्यात येत होते.
त्यामुळे या विरोधात माजी आमदार अनिल गोटे आणि नरेंद्र परदेशी यांनी धुळ्याचे मुख्य न्यायदंडाधिकारी के. बी. चौगुले यांच्या न्यायालयात दावा दाखल केला होता. या दाव्यात संबंधित पैसे आमदार खोतकर यांच्यासाठी त्यांच्या स्वीय सहाय्यक अनिल पाटील यांनी जमा केल्याचा दावा करण्यात आला. त्याची सुनावणी होऊन न्यायालयाने पोलिसांना चपराक देत दखलपात्र गुन्हा दाखल करण्याचे आदेश दिले आहेत.
न्यायालयाच्या या आदेशाने जिल्हा पोलीस यंत्रणेला चांगलीच चपराक बसली आहे. तर, उपमुख्यमंत्री एकनाथ शिंदे पक्षाचे नेते आमदार खोतकर यांचा पाय या निर्णयाने आणखी खोलात जाण्याची शक्यता आहे. तसेच त्यांच्या अडचणीत वाढ होण्याची शक्यता वर्तवली जात आहे. या प्रकरणात विधिमंडळाचे सभापती राहुल नार्वेकर यांनी यापूर्वीच अनिल पाटील यांना निलंबित केले आहे.
दरम्यान, अर्जुन खोतकर यांनी जेव्हा हे प्रकरण घडले होते तेव्हा स्पष्ट केले होते की या प्रकरणाशी त्यांचा काही संबंध नाही. धुळे दौऱ्यावर असताना आपण विश्रामगृहाकडे फिरकलो देखील नसल्याचे त्यांनी म्हटले होते.
विधीमंडळ अंदाज समितीचे प्रमुख आमदार खोतकर हे धुळे दौऱ्यावर होते. त्यावेळी धुळेतील विश्रामगृहात त्यांचे स्वीय सहाय्यक असलेल्या अनिल पाटील यांच्या नावे बूक असलेल्या खोली क्रमांक102 मध्ये अंदाज समितीमधील आमदारांना पैसै वाटण्यात येणार असल्याची माहिती अनिल गोटे यांना मिळाली. त्यांनी ते खोलीवर धाड टाकत कुलूप ठोकले. जिल्हा पोलीस तसेच मुख्यमंत्री, राज्याचे गृहसचिव आणि विविध ठिकाणी फोन करून त्यांनी ही माहिती दिली. यावेळी त्यांनी विश्रामगृहावर ठिय्या मांडला. त्यामुळे रात्री उशिरा जिल्हा पोलीस अधीक्षक देवरे यांनी विश्रामगृहावर धाव घेतली.
विधिमंडळ अंदाज समितीच्या दौऱ्यात आमदार खोतकर यांच्यासाठी पंधरा कोटी रुपये जमा करण्याचे टार्गेट देण्यात आले होते. खोतकर यांचे स्वीय सहाय्यक अनिल पाटील यांच्या ताब्यात संबंधित कक्ष 15 जून पासून होता. अनिल पाटील हे उपजिल्हाधिकाऱ्यांच्या कार्यालयात बसून अधिकारी आणि कंत्राटदारांना फोन करून पैसे जमा करण्याचे आदेश देत होते, असा दावाही माजी आमदार गोटे यांनी केला आहे. पोलिसांनी खोलीची झटती घेतली असता त्यामध्ये 1.84 कोटी रुपये मिळून आले.
माजी आमदार अनिल गोटे यांनी याबाबत शासकीय यंत्रणेवर गंभीर आरोप केला आहे. पोलिस तसेच सबंध सरकारी यंत्रणा हे प्रकरण दडपण्यासाठी कार्यरत झाले होते. मुख्यमंत्री देवेंद्र फडणवीस यांनी एसआयटीची घोषणा केली होती. प्रत्यक्षात या एसआयटीचे काय झाले हे अजून समजलेले नाही. त्यामुळे या प्रकरणात गंभीर कारवाई करावी यासाठी शेवटपर्यंत पाठपुरावा करत राहू असे त्यांनी सांगितले. यावेळी शिवसेना उद्धव ठाकरे पक्षाचे जिल्हाप्रमुख अतुल सोनवणे, याचिका करते नरेंद्र परदेशी आणि तेजस गोटे उपस्थित होते.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.