Nashik Politics News : सानप यांचे एका दगडात दोन पक्षी! भाजप काय करणार?

Nashik Bjp Politics News :

गोदाआरतीसाठी गठीत करण्यात आलेल्या रामतीर्थ गोदावरी सेवा समिती आणि पुरोहित संघातील वाद अद्याप मिटलेला नाही. या वादात आता BJP चे माजी आमदार बाळासाहेब सानप यांनी उडी घेतली आहे. ग्रामसभेचे आयोजन करण्यासह पुरोहित संघाला हक्क मिळवून देण्याची घोषणाही सानप यांनी केली. यानिमित्ताने साईड ट्रॅक असलेले सानप पुन्हा चर्चेत आले. पक्षाला विरोध करण्याचा प्रश्नच नाही. मात्र, अन्याय होत असल्यास न्याय मिळवून देण्याचे काम करावेच लागेल, असा दावा करीत सानप यांनी मतदारसंघात काम सुरू केल्याचे संकेतच दिले आहेत.

परंपरेनुसार अनेक वर्षांपासून गोदाआरती पार पडते. मात्र, गोदाआरतीला व्यापक स्वरूप देण्याचा निर्णय सत्ताधारी भाजपने घेतला. यासाठी जिल्हाध्यक्षाच्या अध्यक्षतेखाली 22 सदस्यांची कमिटी स्थापन करण्यात आली. या समितीत पुरोहित संघाच्या प्रतिनिधींना स्थान देण्यात आले. मात्र, ही संख्या कमी असून परंपरेनुसार आमचा आरतीचा अधिकार कायम ठेवावा, अशी मागणी पुरोहित संघाकडून करण्यात येते आहे. पुरोहित संघ आणि नाशिकमधील आखाडे प्रमुखांची बैठकही पार पडली. पण अद्याप पुरोहित संघाच्या मागणीवर निर्णय झालेला नाही.

त्यातच पुरोहित संघाने यात माजी आमदार बाळासाहेब सानप यांची मदत घेतली. आरती व पुजापाठ शेकडो वर्षांपासून सुरू आहे. ही कामे पुरोहित संघामार्फतच होतात. यात दुमत नाही. एक प्रकारे हा पुरोहितांवर अन्याय असून याबाबत ग्रामसभा घेण्याची तयारी सानप यांनी दर्शवत एक प्रकारे पक्षालाच आव्हान दिले. मात्र, मी अन्यायाविरोधात उभा आहे. त्यात पक्षाचा संबंध नाही. विकासकामे झालीच पाहिजेत. मला रामतीर्थ गोदावरी सेवा समितीत जाण्याची इच्छा नाही. शेकडो वर्षांपासून येथे काम करणाऱ्या पुरोहितावर अन्याय होऊ नये, अशी आपली भूमिका असल्याचे सानप यांनी स्पष्ट केले.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

मागील पाच कुंभमेळ्यांचा मी साक्षीदार आहे. नगरसेवक, उपमहापौर, महापौर पुढे आमदार म्हणून काम करताना या बाबी हातळल्या आहेत. याचा अनुभव असल्यानेच मी पुरोहित संघासोबत असल्याचे सानप म्हणाले. सानप अगदी सुरूवातीच्या काळापासून भाजपसोबत राहिले. मात्र, तत्कालीन पालकमंत्री गिरीश महाजन आणि बाळासाहेब सानप यांच्यात दुही निर्माण झाली. त्यातच पूर्व विधानसभा मतदारसंघासाठी भाजपने सानप यांची दावेदारी डावलून राहुल ढिकले यांना पुढे केले. यामुळे सानप यांनी राष्ट्रवादीचा रस्ता धरला. पण या तिकीटावर त्यांना विजय संपादन करता आला नाही. काहीच दिवसात त्यांनी पुन्हा भाजपवासी होण्याचा निर्णय घेतला.

मूळ घरी परतल्यानंतर सानप अज्ञातवासातच आहे. पक्षाकडून एकप्रकारे त्यांना साईड ट्रॅक केल्याचे चित्र आहे. तुर्तास आगामी विधानसभा निवडणुकीच्या पार्श्वभूमीवर बाळासाहेब सानप यांचे गोदाआरतीच्या निमित्ताने होणारे पुनरागमन लाभदायी ठरणार काय? याकडे सर्वांचे लक्ष आहे. गोदाआरतीचा वाद सुरू असलेला पंचवटी परिसर पूर्व विधानसभा मतदारसंघात येतो. येथे भाजपचे आमदार राहुल ढिकले हे प्रतिनिधित्व करतात.

edited by sachin fulpagare