Sujay Vikhe Patil BJP : माझ्या ऑपरेशनमध्ये 'ठाॅय' होऊन जातो माणूस; सुजय विखेंच्या विधानानं खळबळ (Video)

Ahilyanagar political news : स्थानिक स्वराज्य संस्थाच्या निवडणुकीच्या अनुषंगाने भाजप मंत्री राधाकृष्ण विखे पाटील यांनी अहिल्यानगर जिल्ह्यात 'ऑपरेशन लोटस' सुरू केलं आहे. त्याची सुरूवात त्यांनी अकोले तालुक्यातून सुरू केली आहे.

सुनीता भांगरे आणि त्यांच्या समर्थकांचा भाजपमध्ये प्रवेश मुंबईत घडवून आणला आहे. मंत्री विखे पाटील यांचे पुत्र सुजय विखे पाटील यांनी 'ऑपरेशन लोटस'वर प्रतिक्रिया देताना खळबळ उडवून दिली.

माजी खासदार सुजय विखे पाटील थेट भाष्य करण्यासाठी ओळखले जातात. यातून ते कधी अडचणीत देखील सापडले आहेत. त्यांचे वडिल मंत्री राधाकृष्ण विखे पाटील अहिल्यानगर जिल्ह्यात ऑपरेशन लोटस सुरू केलं असून, त्यावर प्रतिक्रिया देताना खळबळजनक विधान केलं आहे.

सुजय विखे म्हणाले, "मी डाॅक्टर या नात्याने माझं ऑपरेशन हे माझ्यापद्धतीने करतो. 'ऑपरेशन लोटस' हा राजकीय शब्द आहे. माझे ऑपरेशन वेगळी असतात. माझ्या ऑपरेशनमध्ये ठाॅय होऊन जातो माणूस." त्यामुळे बाकीचे प्रवेश, राष्ट्रवादी काँग्रेस पार्टी शरदचंद्र पवार पक्ष हा काही एकटाच टार्गेट नाही, असेही सुजय विखे पाटील यांनी म्हटले.

'राष्ट्रवादी काँग्रेस पार्टी शरदचंद्र पवार पक्ष आणि शिवसेना उद्धव बाळासाहेब ठाकरे सेना पक्ष टार्गेट असणार आहे. पण आम्ही आम्ही काँग्रेसचे लोकं घेणार नाही. कारण की, त्यांचाच पक्ष संपलेला आहे. ही आमची मानसिकता झालेली आहे. त्यांचाच पक्ष संपलेला आहे. आणि त्यांना इथं घेऊन पक्ष संपवायचं नाही, अशी आमची भूमिका आहे,' असा टोला देखील सुजय विखे पाटील यांनी लगावला.

दोन टक्के सुद्धा काम नाही

सुजय विखे पाटील यांनी खासदार नीलेश लंके यांच्यावर टीका केली. ते म्हणाले, “मागच्या एका वर्षात मी जेवढं काम केलं, त्याच्या दोन टक्के सुद्धा काम आजच्या खासदाराने केलं नाही. माझा पराभव झाला, पण मी जनतेसाठी थांबलो नाही. जनतेला काही लोकांच्या भरोशावर सोडणं योग्य नाही. आम्ही थांबलो असतो तर जिल्ह्याचा विकासच थांबला असता."

चुकीचा माणूस निवडला तर...

'मतदान (Voter) ही लोकशाहीची ताकद आहे. चुकीचा माणूस निवडला तर आपल्या मुलांचं भविष्य धोक्यात येईल. विकास करणाऱ्या माणसाच्या पाठीमागे उभं राहा. हा संघर्ष सत्तेसाठी नाही, तर तुमच्या भवितव्यासाठी आहे,' असेही विखे पाटील यांनी म्हटले.