Vivek Kolhe MLC election : एक तपानंतर ‘कमबॅक’! विधान परिषद ‘फिक्स’! विवेक कोल्हेंचा गुलालात जल्लोष; राज्यात मोठ्या भूमिकेचे संकेत

Kopargaon BJP celebration : राज्य विधान परिषदेची निवडणूक बिनविरोध ठरली आहे. या नऊ उमेदवारांच्या विजयाच्या घोषणेची औपचारिकता आता चार मे रोजी पार पडणार आहे. बिनविरोधामुळे निश्चिंत झालेले उमेदवार आपापल्या मतदारसंघात परतले आहे.

भाजपचे युवा नेते विवेक कोल्हे काल उशिरा कोपरगावात दाखल होता, कार्यकर्त्यांनी त्यांची विजयी मिरवणूक काढली. या वेळी विवेक कोल्हे यांनी, राज्य पातळीवर काम करण्याचे सूचक संकेत दिले. त्यामुळे विवेक कोल्हे यांच्या या प्रतिक्रियेमुळे विरोधकांसह स्थानिक सत्ताधाऱ्यांमध्ये चर्चेचा विषय ठरला आहे.

विवेक कोल्हे म्हणाले, "कोपरगावसह (Kopargaon), पक्षाच्या इतर काही, तालुके, शहर, संपूर्ण महाराष्ट्रातील युवा पिढीचे सहकारातील, कृषीचे, शेतकऱ्यांचे प्रश्न सोडवण्याची अपेक्षा आहे. त्यावर निश्चितपणे काम करत राहील."

बारा वर्षापूर्वी स्नेहलता कोल्हे विधानसभा निवडणूक जिंकल्या होत्या, त्यावेळी गुलाल अंगावर घेतला होता. त्यानंतर आज विधान परिषदेच्या निमित्ताने पुन्हा विजयाचा गुलाल अंगावर घेतला आहे. त्यामुळे कार्यकर्त्यांमध्ये वेगळा उत्साह आहे, असेही विवेक कोल्हे (Vivek Kolhe) यांनी म्हटलं.

या विजयाच्या गुलालाबरोबर कार्यकर्त्यांचा देखील वनवास संपला आहे. मतदारसंघात सर्वाधिक लोकनियुक्त सरपंच हे भाजप विचारांचे आहेत. त्यांना अधिकची ताकद मिळत नव्हती. विधान परिषदेच्या निमित्ताने देवाभाऊंनी जो समतोल इथं साधला आहे, त्यामुळे कार्यकर्त्यांना बळ मिळणार असल्याचे विवेक कोल्हे यांनी सांगितले.

कोपरगावात विधानसभेचे आमदार आशुतोष काळे हे आहेत. मग एका म्यानात दोन तलावारी कशा राहणार? यावर बोलताना विवेक कोल्हे यांनी मिश्किलपण समतोल साधणारी प्रतिक्रिया दिली. ते म्हणाले, 'सगळं काही होईल. सकारात्मक विचार करू या. कोपरगावला यामुळे फायदाच होणार आहे.'

कोपरगावकरांमुळे संधी मिळाली आहे. कोपरगावसह महाराष्ट्रातील सहकारातील युवकांचे, शेतकऱ्यांचे, कृषीचे प्रश्न मोठे आहेत, ते सोडवण्यासाठी काम करत राहणार, असे सांगत महाराष्ट्राचे नेतृत्व करणार असल्याचे संकेत विवेक कोल्हे यांनी दिले.