Balasaheb Thorat : 'स्थानिक'च्या निवडणुकांना 'MVA' कशी समोरं जाणार; बाळासाहेब थोरात म्हणाले...

Ahilyanagar Congress updates : महायुती सरकार सर्वच पातळीवर कुचकामी ठरलं आहे. स्थानिक स्वराज्य संस्थांच्या निवडणुकीत त्यांना त्यांची जागा दिसेल. या निवडणुकीला महाविकास आघाडी एकत्रित समोरे जाणार की, स्वतंत्र यावर लवकरच निर्णय होईल.

परिस्थिती पाहून निर्णय घेताना, वेळ वाया जाणार नाही, याची काळजी घेऊ, असे सांगून स्थानिकसाठी 'मविआ'ची तयारी सुरू असल्याचे संकेत काँग्रेस नेते बाळासाहेब थोरात यांनी दिले.

राज्यात आगामी काळात जिल्हा परिषद, पंचायत समिती, नगरपालिका, महानगरपालिका आदी स्थानिक स्वराज्य संस्थांच्या निवडणुका होतील. या निवडणुका मविआ म्हणून एकत्र लढवायच्या की, स्वतंत्र याबाबत बाळासाहेब थोरात (Balasaheb Thorat) यांनी मोठं विधान केलं.

अहिल्यानगर जिल्ह्यातील काँग्रेस (Congress) पक्षाचा विस्तार, संघटन बांधणीसाठी पक्ष निरीक्षक तथा प्रदेश उपाध्यक्ष शरद आहेर, बाळासाहेब थोरात यांच्या उपस्थितीत आढावा बैठक झाली. थोरात म्हणाले, "काँग्रेस पक्षाचे संघटन वाढविले जाणार आहे. लोकसभा, विधानसभा निवडणुकीच्या परिणामानंतर काही कार्यकर्ते पक्षातून गेले असतील. पण काँग्रेस हा मोठा पक्ष आहे. नवीन कार्यकर्ते तयार होतात. त्यामुळे संघटन थांबत नसते. पक्षाच्या कार्यकर्त्यांची बैठक घेऊन, त्यांच्याशी विचार-विनिमय करून पक्ष संघटनेच्या रिक्त जागा भरल्या जात असून राज्यात वेगवान प्रक्रिया सुरू करण्यात आली आहे".

बाळासाहेब थोरातांनी महायुती सरकारवर जोरदार टीका केली. महायुती सरकार सर्वच पातळीवर जनतेचा भ्रमनिराश केला आहे. जनतेच्या मनात भ्रमनिराश निर्माण झालेली आहे. भाजप-शिवसेना-राष्ट्रवादी काँग्रेस महायुतीने विधानसभा निवडणुकीच्या वेळेस शेतकरी कर्जमाफी, लाडकी बहीण योजनेत दरमहिन्याला 2100 रूपये देणे, अशा घोषणा केल्या. प्रत्यक्षात शेतकरी कर्ज माफी केली नाही. लाडक्या बहिणींना दीड हजार मिळणे अवघड झाले, झाल्याचे सांगितले. समाजातील निराधार व्यक्तींसाठी असलेल्या संजय गांधी निराधार योजनेच अर्थसहाय रखडले. अवकाळीची नुकसान भरपाई नाही. राज्यातील युतीचे सरकार हे गोरगरिबांसाठी कुचकामी ठरल्याची टीका थोरातांनी केली.

जम्मू-काश्मिरमधील पहलगाम इथं मोठ्या संख्येने पर्यटक येतात. अतिरेक्यांच्या हल्ल्यामध्ये निरापराध व्यक्तींचे प्राण जातात. ही दुर्दैवी घटना आहे. सुरक्षेसाठी कोणतीही व्यवस्था नव्हती. पंतप्रधान नरेंद्र मोदी आणि गृहमंत्री अमित शाह यांनी याचे समाधानकारक उत्तर देणे जबाबदारीचे होते. परंतु, याचे समाधानकारक उत्तर दिले जात नाही. या हल्ल्यानंतर तेथील मुस्लिम बांधवांनी स्वतःच्या जीवाची पर्वा न करता पर्यटकांचे प्राण वाचविले. राष्ट्रीय एकात्मतेचे दर्शन घडविले हे देशातील एकात्मतेचे दर्शन घडवणारे आहे, याकडे थोरातांनी लक्ष वेधलं.