Manoj Jarange Patil Agitation: एकनाथ शिंदेंचे मंत्री म्हणाले, जरांगे पाटील यांच्या मागण्या रास्त!

Dada Bhuse News: मनोज जरांगे पाटील शुक्रवारी (ता.२९) मुंबईतील आझाद मैदानात आंदोलनासाठी मार्गस्थ झाले आहेत. ते आज शिवनेरी किल्ल्यावर छत्रपती शिवाजी महाजारांजांना आदरांजली वाहतील. त्यांच्यासमवेत हजारो समर्थक असल्याने राज्य शासन सावध आहे.

मराठा समाजाला ओबीसी प्रवर्गातून आरक्षण मिळावे. मराठा हा ओबीसी प्रवर्गातीलच समाज आहे. यासंदर्भात राज्य शासन टाळाटाळ करीत आहे. त्यामुळे त्याला वेगळे आरक्षण देऊन राजकारण करू नये, अशी मराठा आरक्षणाचे नेते भूमिका मनोज जरांगे पाटील यांनी घेतली आहे.

शुक्रवारी मुंबईत आझाद मैदानावर मनोज जरांगे पाटील यांचे आंदोलन होणार आहे. आंदोलनाच्या पार्श्वभूमीवर राज्य शासन सावध झाले आहे. विशेषता मुख्यमंत्री देवेंद्र फडणवीस यांच्यावर मराठा समाजाचा रोष आहे. त्यामुळे फडणवीस यांच्या समर्थनासाठी भाजपचे अनेक नेते मैदानात उतरले आहेत.

या आंदोलनाच्या पार्श्वभूमीवर शालेय शिक्षण मंत्री दादा भुसे यांनी आपली भूमिका स्पष्ट केली आहे. मनोज जरांगे पाटील यांच्या मागण्या रास्त आहेत, असे ते म्हणाले. जरांगे नापाटील यांनी आपल्या मागण्यांवर आंदोलन करण्यापेक्षा चर्चेसाठी पुढे यावे. चर्चेतून निश्चितच चांगला मार्ग निघेल, असा विश्वास भुसे यांनी व्यक्त केला.

भारतीय जनता पक्ष कडून जरांगे पाटील यांच्यावर थेट टीका केली जात आहे. या पार्श्वभूमीवर मंत्री दादा भुसे यांनी वेगळा अँगल घेतला आहे. त्यामुळे तो चर्चेचा विषय बनला आहे. जरांगे पाटील यांनी देखील आंदोलनासाठी निघताना उपमुख्यमंत्री एकनाथ शिंदे यांच्या विषयी सॉफ्ट भूमिका व्यक्त केली होती. त्यामुळे भुसे यांची भूमिका हा योगायोग की राजकारणाचा भाग याचीही चर्चा सुरू आहे.

मनोज जरांगे पाटील यांच्या समर्थनार्थ राज्यभरातून मराठा समाजाचे कार्यकर्ते मुंबईला मार्गस्थ होत आहेत. समर्थकांची वाढती गर्दी पोलिसांच्या दृष्टीने चिंतेचा विषय आहे. राज्य शासनाने ही गेल्या दोन दिवसात हालचाली गतिमान करीत चर्चेसाठी जरांगे यांच्याकडे काही प्रतिनिधी पाठविले आहेत.