Girish Mahajan : 'राम नाम जपना आणि पराया माल अपना' असं उद्धव ठाकरेंचं धोरण...'; भाजप नेत्याने डिवचलं

Nashik News, 22 Jan : महापालिका निवडणुकांची गट नोंदणी सुरू झाली आहे. त्यासाठी पुन्हा एकदा नगरसेवकांची फोडाफोडी सुरू झाली आहे. या पार्श्वभूमीवर भाजप नेते गिरीश महाजन यांनी विरोधकांना ललकारले आहे.

नाशिक जळगाव धुळे आणि अहिल्यानगर महापालिकांच्या भाजप नगरसेवकांची गट नोंदणी बुधवारी झाली. यावेळी गिरीश महाजनांनी नवनिर्वाचित नगरसेवकांना मार्गदर्शन केले. यानिमित्ताने त्यांनी भाजपच्या निवडणुकीतील चुकाही सांगितल्या.

मुख्यमंत्री देवेंद्र फडणवीस सध्या परदेशात आहेत. ते राज्यात परतल्यावरच सध्या सुरू असलेल्या कल्याण डोंबिवली येथील घडामोडींवर बोलतील. भाजपला राज्यात महापालिका निवडणुकांमध्ये चांगले यश मिळाले, याकडे त्यांनी लक्ष वेधले.

यावेळी मंत्री महाजन यांनी विरोधकांना पुन्हा एकदा ललकारले. विरोधकांकडे कोणीही नेता नाही. उद्धव ठाकरे हे फक्त मुंबई महापालिकेवरच लक्ष ठेवून होते. 'राम नाम जपना आणि पराया माल अपना' असे त्यांचे धोरण आहे.

राज्यातील महापालिका निवडणुकांमध्ये विरोधक हे काही महापालिकेत सत्तेवर येणार नाहीत, या आपल्या विधानाची त्यांनी आठवण करून दिली. विरोधकांचे अस्तित्व निवडणुकीत कुठेही जाणवले नाही. कोणीही नेता प्रचाराला फिरकला नाही. त्यामुळे विरोधक आत्मविश्वास गमावून बसले आहेत, असे ते म्हणाले.

नाशिक मध्ये दहा नगरसेवकांनी भाजपशी संपर्क केल्याचा दावा त्यांनी केला. आपण मात्र कोणाशीही संपर्क केलेल्या नाही, हे देखील त्यांनी सांगितले. राज्यभरातील नगरसेवकांना भाजपमध्ये यायचे आहे. तसे संकेत मिळत आहेत.

संजय राऊत यांनी केलेल्या टीकेला महाजन यांनी उत्तर दिले. ते म्हणाले, संजय राऊत यांच्याकडे बोलण्यासारखे काहीही राहिलेले नाही. त्यांचे सध्याचे वक्तव्य म्हणजे, "गिरे तो भी मेरी टांग उपर" असे आहे.

एकंदरच महापालिका निवडणुकांमध्ये उत्तर महाराष्ट्रात भाजपला घवघवीत यश मिळाले आहे. त्यामुळे पुन्हा एकदा पक्षात मंत्री महाजन यांचा धबधबा वाढणार आहे. तो आत्मविश्वास त्यांच्या वक्तव्यात जाणवत होता.