Girish Mahajan News : दुष्काळग्रस्तांच्या मदतीसाठी गिरीश महाजन यांच्या सूचना!

Dhule News : काँग्रेससह विविध विरोधक दुष्काळामुळे त्रस्त शेतकऱ्यांच्या मदतीसाठी आक्रमक झाले आहेत. त्यामुळे प्रशासनाला देखील जाग आल्याचे चित्र आहे. याबाबत पालकमंत्री गिरीश महाजन यांनी बैठक घेऊन दुष्काळग्रस्त शेतकऱ्यांच्या मदतीसाठी सर्वेक्षण करण्याच्या सूचना दिल्या आहेत. (Guardian Minister Girish Mahajan instruts administration for draught)

धुळे (Dhule) जिल्ह्यात गेल्या महिन्याभरात पावसाने दडी मारली आहे. त्यामुळे दुष्काळाची स्थिती असल्याने काँग्रेस, (Congress) शिवसेना (Shivsena) तसेच विरोधी पक्षांनी याबाबत राज्य सरकारला धारेवर धरले आहे. आंदोलन होत असल्याने पालकमंत्री गिरीश महाजन (Girish Mahajan) यांनीही सूचना केल्या.

दुष्काळाच्या प्रश्नावर राजकारण तापले आहे. त्यामुळे धुळे जिल्ह्यात काँग्रेस पक्षाने याबाबत दोन दिवसांचा अल्टीमेटम प्रशासनाला दिला आहे. शिवसेनेने (ठाकरे गट) यांनीही आंदोलन केले होते. विविध राजकीय पक्ष याबात पाठपुरावा करीत असल्याने दुष्काळाच्या प्रश्नावरील राजकारण तापले आहे.

याअनुषंगाने पालकमंत्र्यांनी देखील सूचना केल्या आहेत. जिल्ह्यात काही भागांत २१ ते २३ दिवसांपासून पावसाचा खंड पडला आहे. त्यामुळे खरीप हंगामातील पिकांची वाढ खुंटली असून, शेतकऱ्यांचे मोठे आर्थिक नुकसान होत आहे. त्यांना धीर देण्यासाठी जिल्हा प्रशासनामार्फत सर्वेक्षण करून पीकविम्यासाठी अधिसूचना निर्गमित करण्याची कार्यवाही जलदगतीने केली जाईल.

ते म्हणाले, की जिल्ह्यात पावसाचा खंड पडल्याने खरीप हंगामातील पिकांची वाढ खुंटली. शेतकरी आर्थिक संकटास सामोरे जात आहे. राज्य सरकारच्या सर्वसमावेशक प्रधानमंत्री पीकविमा योजनेच्या माध्यमातून जिल्ह्यातील दोन लाख ४६ हजार ८४७ शेतकऱ्यांनी एक रुपया भरून कपाशी, उडीद, मूग, सोयाबीन, ज्वारी, मका आदी पिकांचा विमा काढला आहे. निकषांनुसार २५ टक्के नुकसानभरपाईची रक्कम अग्रिम स्वरूपात देण्यात येते. त्यानुसार जिल्ह्यातील पावसाचा अहवाल संकलित करून साह्य करावे.