Gram Panchayat Election Results : चाळीसगावातील ११ ग्रामपंचायतींमध्ये भाजपचं कमळ फुललं; आमदार मंगेश चव्हाणांनी मैदान मारलं

Maharashtra Gram Panchayat Election 2023 Result : जळगाव : जिल्ह्यातील चाळीसगाव तालुक्यातील १२ ग्रामपंचायतींपैकी ११ ग्रामपंचायतींचे निकाल लागले आहेत. निवडणुकीत भारतीय जनता पक्षाचे आमदार मंगेश चव्हाण यांनी आपली ताकद दाखवली आहे. यात भाजपने तब्बल ११ ग्रामपंचायतींवर आपले वर्चस्व मिळविले आहे, तर एका ग्रामपंचायतीत राष्ट्रवादी कॉंग्रेस शरद पवार गटाचा विजय झाला आहे.

चाळीसगाव तालुक्यात बारा ग्रामपंचायतीच्या निवडणुका आहेत. त्यापैकी एक पातोंडा ग्रामपंचायतीची निवडणूक बिनविरोध झाली. ती ग्रामपंचायत भाजपच्या ताब्यात आहे, तर ११ ग्रामपंचायतींसाठी निवडणुका घेण्यात आल्या. त्यापैकी सर्व ग्रामपंचायतीचे निकाल लागले आहेत. त्यात भारतीय जनता पक्षाने दहा ग्रामपंचायतीत यश मिळविले आहे, तर एका ग्रामपंचायतीवर राष्ट्रवादी कॉंग्रेस शरद पवार गटाला यश मिळाले आहे.

रामनगर, माळशेवगे, खेरडे, खेडगाव, वडाळावडाळी व न्हावेढोमणे,दहिवद, हिरापूर, सेवानगर, ओसर ग्रामपंचयातीवर भारतीय जनता पक्षाचा झेंडा फडकला आहे. पिंप्री ग्रामपंचायतीवर राष्ट्रवादी कॉंग्रेस शरद पवार गटाचा झेंडा फडकला आहे. खेडगाव ग्रामपंचायत राष्ट्रवादी कॉंग्रेसचे माजी जिल्हा परिषद सदस्य शशिकांत साळुंखे यांचे वर्चस्व होते, परंतु या वेळी त्यांना झटका बसला आहे. या ठिकाणी त्यांचे वर्चस्व संपुष्टात आले असून, ही ग्रामपंचायत भारतीय जनता पक्षाच्या ताब्यात आली आहे. या ठिकाणी आमदार मंगेश चव्हाण यांच्या नेतृत्वाखाली भाजपचे अविनाश चव्हाण यांनी बाजी मारली आहे.

विजयी झालेले सरपंच...

खेडगाव- मरसाळे उषाबाई विनायक माळशेवगे- पाटील सुरेश युवराज

खेरडे- करिश्‍मा वाल्मीक निकम

रामनगर- दिनेश प्रकाश जाधव

न्हावे ढोमणे- वासुदेव वाल्मीक खैरनार

वडाळा वडाळी- अनिल युवराज पाटील

दहीवद- पंकज शिवाजी पवार

हिरापूर- विनोद आनंदराव पाटील

सेवानगर- जवाहरलाल प्रल्हाद चव्हाण

ओसर- प्रणाली राहुल पवार (सर्व भाजप),

पिंप्री बुद्रुक प्रचा- राजेंद्र नारायण मोरे (राष्ट्रवादी कॉंग्रेस शरद पवार गट)