Gram Panchayat Election: सरपंचांचे मत निर्णायक ! गावोगावी उपसरपंचपदाच्या निवडीत चुरस

Ahmednagar News : नगर जिल्ह्यातील 194 ग्रामपंचायतीच्या निवडणुकांची प्रक्रिया पूर्ण झाली आहे. सरपंच आणि सदस्यांची मतदानाद्वारे निवड झाल्यानंतर आता उपसरपंचपदाच्या निवडणुका सुरू आहे. बहुतांश ठिकाणी बिनविरोध निवडीला प्राधान्य दिल्याचे दिसते. मात्र, श्रीरामपूर तालुक्यातील उक्कलगाव आणि भोकर गावच्या उपसरपंचपदाची निवड चुरशीच्या लढतीने चर्चेत आली. या ग्रामपंचायतीत उपसरपंचपदाच्या निवडणुकीत सरपंचांचे मत निर्णायक ठरले आहे.

उक्कलगाव सत्ताधारी गटामधून माजी सरपंच नितीन थोरात आणि शरद थोरात दोघांनी अर्ज दाखल केले होते. विरोधी गटातून वकील पुरूषोत्तम थोरात यांचे दोन, असे चार अर्ज दाखल झाले. दोन्ही गटाकडून एक-एक अर्ज माघारी घेण्यात आले.

उपसरपंचपदासाठी दोनच अर्ज शिल्लक राहिले. दोन्ही उमेदवारांना समसमान प्रत्येकी आठ-आठ मते मिळाली. त्यामुळे सरपंच रवीना शिंदे यांनी आपले निर्णायक मत दिले. सरपंच शिंदे यांच्या निर्णायक मतामुळे सत्ताधारी गटाचे नितीन थोरात यांची उपसरपंचपदी निवड झाली.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

भोकर ग्रामपंचायतीत उक्कलगावची उसरपंचपदाच्या निवडीची पुनरावृत्ती झाली. येथे कानडे-ससाणे गटाच्या शीतल पटारे या सरपंच आहेत. त्यांचे सात सदस्य, तर मुरकुटे-ससाणे गटाचे आठ सदस्य आहेत. मुरकुटे-ससाणे गटाचे गिरीश मते आणि कानडे-ससाणे गटाचे सागर आहेर यांनी उपसरपंचपदासाठी अर्ज दाखल केले.

सरपंच शीतल पटारे यांनी आहेर यांना मतदान केल्याने दोघांनाही आठ-आठ समान मते मिळाली. समान मते पडल्यानंतर सरपंच यांना निर्णायक मत देण्याचा अधिकारानुसार त्यांनी सागर आहेर यांच्या पारड्यात मत टाकले. यानुसार सागर आहेर यांची उपसरपंचपदी निवड झाली.

सरपंचाचे मत निर्णायक

सरपंचांना राज्य सरकारने काही अधिकार दिले आहेत. पहिले दोन वर्ष त्यांच्यावर अविश्वास ठराव आणता येणार नाही. त्यांच्या अध्यक्षतेखाली उपसरपंचाची निवडणूक होईल. उपसरपंच निवडणुकीत सरपंच हे सदस्य म्हणून मतदान करणार आहेत. उपसरपंच निवडणुकीत दोन उमेदवारांना समान मते पडल्यास एक निर्णायक मत देण्याचा अधिकारी सरपंचांना असणार आहे.

(Edited By - Ganesh Thombare)