Gulabrao Patil : पक्षात घेतलेले जळगावचे लोकही तपासा, हगवणे प्रकरणानंतर गुलाबराव पाटलांचा अजित पवारांना सल्ला

Jalgaon News | एकनाथ शिंदे यांच्या शिवसेना पक्षाचे नेते व जळगाव जिल्ह्याचे पालकमंत्री गुलाबराव पाटील यांनी पुण्याच्या वैशाली हगवणे प्रकरणावर प्रतिक्रिया दिली आहे. या प्रकरणावरुन गुलाबराव पाटील यांनी केलेलं विधान चर्चेत आलं आहे. जळगावमध्ये ते माध्यमांशी बोलत होते.

गुलाबराव पाटील म्हणाले, हगवणे सारखा नालायक व्यक्ती पक्षात नको असं वक्तव्य अजित पवारांनी केलं. केवळ हगवणे नाही तर पक्षात घेतलेली सर्व लोक तपासा असा सल्ला गुलाबरावांनी अजित पवारांना दिला आहे. जळगावातले जे लोक अजित दादांनी पक्षात घेतले त्यांनाही तपासलं पाहिजे असा टोला गुलाबराव पाटील यांनी लगावला आहे.

काही दिवसांपूर्वी शरद पवार यांच्या राष्ट्रवादीतून बाहेर पडत जळगावातील अनेक बड्या नेत्यांनी अजित पवार यांच्या पक्षात प्रवेश केला. गुलाबराव पाटील यांचा या नेत्यांच्या प्रवेशाला विरोध असतानाही अजित पवार यांनी त्यांना पक्षात घेतलं म्हणून गुलाबराव पाटील नाराज होते. विशेष: गुलाबराव देवकर यांना पक्षात घेतल्याने पाटील नाराज होते. त्या पार्श्वभूमीवर गुलाबरावांनी केलेल्या या विधानामुळे खळबळ उडाली आहे. गुलाबरावांचा रोख देवकर यांच्याकडे असल्याचे बोलले जात आहे.

ते पुढे म्हणाले, पुण्याच्या वैशाली हगवणे हुंडाबळी प्रकरणात कारवाई करण्यासाठी शासनाकडून पावले उचलली जात असून या प्रकरणात दोषींना शिक्षा झाल्याशिवाय राहणार नाही, जे कोणी अन्याय अत्याचार करत असतील त्यांच्यावर कठोर कारवाई झालीच पाहिजे. जळगावातले जे लोक अजित दादांनी पक्षात घेतले त्यांचीही अशीच प्रकरणं बाहेर येतील. त्यामुळे जळगाव जिल्ह्यातीलही जे लोक अजितदादांनी पक्षात घेतले त्यांनाही तपासलं पाहिजे असा चिमटा त्यांनी नाव न घेता माजी मंत्री गुलाबराव देवकर यांना लगावला.

यावेळी धुळे विश्रामगृहातील कोट्यवधी रुपयांच्या प्रकरणावरुनही मंत्री गुलाबराव पाटील यांनी प्रतिक्रिया दिली. धुळे येथील शासकीय विश्रामगृहात कोट्यावधी रुपये आमदारांसाठी आणल्याचा आरोप ठाकरे गटाचे माजी आमदार अनिल गोटे यांनी केला आहे, मात्र या प्रकरणात तपास केला जाणार असून तपासात निष्पन्न होईल ते जनतेच्या समोर येईल असे मंत्री गुलाबराव पाटील यांनी म्हटले आहे.