Nashik Shivsena News : भेटीगाठी म्हणजे दबावाचे राजकारण नसते!

Babanrao Gholap News : मी शिवसेनेचाच आहे. शिवसेना सोडण्याचा कोणताही विचार माझ्या मनात नाही. माझ्याबाबतच्या सर्व राजकीय चर्चा निराधार आहेत, असे स्पष्टीकरण शिवसेनेचे उपनेते बबनराव घोलप यांनी दिले आहे. (Meeting with alliance leaders is not at all pressure tacties)

गेले काही दिवस चर्चेचा विषय ठरलेले शिवसेनेचे (Shivsena) माजी मंत्री बबनराव घोलप (Nashik) यांनी आपण कोणतेही दबावाचे राजकारण (Mahavikas Aghadi) करीत नसल्याचे स्पष्टीकरण दिले आहे.

माजी मंत्री बबनराव घोलप यांनी उपनेतेपदाचा राजीनामा दिला होता. शिर्डी लोकसभा मतदारसंघातील शिवसेनेअंतर्गत राजकीय वादातून त्यांनी हा राजीनामा दिला होता. त्यानंतर पक्षप्रमुख उद्धव ठाकरे यांनी हा राजीनामा फेटाळला होता.

यासंदर्भात घोलप यांची शिवसेना नेते संजय राऊत यांच्याशी चर्चा झाली होती. लवकरच पक्षप्रमुख उद्धव ठाकरे यांच्याशी घोलप यांची भेट होणार होती. मात्र, ही भेट होऊ शकली नसल्याने घोलप नाराज असल्याची चर्चा पसरली होती.

घोलप यांनी मुंबईत चर्मकार संघाचा मेळावा घेत शक्तिप्रदर्शन केले होते. त्यानंतर त्यांनी नुकतीच बहुजन विकास आघाडीचे नेते प्रकाश आंबेडकर यांची भेट घेतली होती. त्याच दिवशी माजी आमदार योगेश घोलप यांनी राष्ट्रवादी काँग्रेसचे प्रमुख शरद पवार यांची भेट घेतली होती. त्यामुळे राजकीय नेत्यांच्या भुवया उंचावल्या होत्या.

या पार्श्वभूमीवर घोलप म्हणाले, राष्ट्रवादी काँग्रेसचे नेते शरद पवार हे महाविकास आघाडीचे नेते आहेत. प्रकाश आंबेडकर यांचा शिवसेनेशी संपर्क आहे. त्यामुळे या नेत्यांची भेट घेतल्याचा वेगळा अर्थ कोणीही काढू नये. मी शिवसेनेतच आहे. यामध्ये कोणतेही दबावाचे राजकारण नाही.