Pakistani Citizens in Jalgaon : धक्कादायक ! जळगावात आढळले ३२७ पाकिस्तानी, एकाकडेही सार्क व्हिसा नाही

Kashmir Pahalgam Terror Attack : जम्मू आणि काश्मिरमील पहलगाम येथे पर्यटकांवर झालेल्या दहशतवादी हल्ल्यानंतर भारत सरकारने कठोर पाऊल उचलत पाच मोठे निर्णय घेतले आहेत. त्यात पाकिस्तानी नागरिकांनी ४८ तासांत भारत सोडण्याचे आदेश दिले आहेत. त्यानुसार देशात वास्तव्यास असलेल्या पाकिस्तान नागरिकांचा शोध घेतला जात आहे.

महाराष्ट्रातील जळगाव शहरासह जिल्ह्यात ३२७ पाकिस्तानी नागरिकांचे वास्तव्य आढळून आले आहे. जळगावात वास्तव्यास असलेल्या ३२७ पैकी १२ लोकांनी व्हिसा वाढवून मिळण्याची मागणी केल्याची माहिती मिळत आहे. या सगळ्या लोकांविरोधात शासनाकडून जसे आदेश येतील त्यापद्धतीने पावले उचलण्यात येतील अशी माहिती पोलिसांनी दिली आहे.

अप्पर पोलिस अधीक्षक अशोक नखाते यांनी यासंदर्भात अधिक माहिती दिली आहे. ३२७ पाकिस्तानी नागरिकांपैकी कुणाकडेही सार्क व्हिसा नाही. हे नागरिक जळगावमध्ये टुरिस्ट व्हिसावर आले आहेत. त्या सगळ्या लोकांच्या कागदपत्रांची पडताळणी करण्यात आली आहे. यातील १२ लोकांनी टुरिस्ट व्हिसाच्या मुदत वाढीसाठी अर्ज केला आहे. सरकाकरडून निर्देश येतील त्यानुसार कारवाई करु अशी माहिती नखाते यांनी दिली आहे.

पाकिस्तानातून येऊन भारतात कामधंदे करुन भारतातून आर्थिक मदत पुरवली जात असल्याचे समोर आले आहे. शहरात संपूर्ण उपनगराइतक्या लोकसंख्येत ही मंडळी मिसळून असल्याने सहजासजी कुणाला मिळून येत नाहीत. जळगाव शहर मतदारसंघाचे भाजपचे आमदार सुरेश भोळे ही गंभीर बाब असून असे लोक जळगावमध्ये सुद्धा घातपात घडवू शकतात अशी भीती व्यक्त केली आहे. जळगावमध्ये फिरण्यासाठी पाकिस्तानी नागरिक आले मात्र व्हिजाची मुदत संपूनही परतले नसून जळगावतच वास्तव्य करत असल्याची माहिती आहे.

पहलगाम येथे पर्यटकांवरील हल्ल्यानंतर केंद्र सरकारने त्याची गंभीर दखल घेत पाकिस्तानविरोधात कडक धोरण अवलंबिले आहे. पाकिस्तानातून भारतात सार्क व्हिजा, टुरिस्ट व्हिजा घेऊन आलेल्या नागरिकांनी तत्काळ भारत सोडण्याचे आदेश मोदी सरकारने दिले आहेत. यानंतर जळगाव पोलिस यंत्रणा अॅक्टीव्ह मोडवर आली असून सक्रीय जळगावात बेकायदेशीरपणे राहणाऱ्या पाकिस्तानी नागरिकांची पडताळणी सुरू करण्यात आली आहे.

नाशिकमध्ये सहा पाकिस्तानी महिला वास्तव्यास

नाशिक शहरात सहा पाकिस्तानी नागरिक वास्तव्यास असून त्यांनाही भारत सोडण्यासाठी पोलिसांकडून नोटीस बजावली जाणार आहे. विशेष म्हणजे या सहा च्या सहा महिला आहेत. मागील काही दिवसांपासून त्या अधिकृतरित्या वास्तव्यास आहेत. भारताने ४८ तासांची मुदत दिल्यामुळे या महिलांनाही तत्काळ पाकिस्तानमध्ये परतावे लागणार आहे.