Jalgaon MLC Election 2010 : खडसेंना झटका देत अपक्ष उमेदवारानं मारलं होतं जळगावचं मैदान ; सुरेश जैन ठरले होते किंगमेकर

Jalgaon MLC Election : जळगाव स्थानिक स्वराज्य संस्था मतदारसंघाची २०१० मधील विधानपरिषद निवडणूक राज्याच्या राजकारणात विशेष चर्चेचा विषय ठरली होती. या निवडणुकीत भाजपचे तत्कालीन विरोधी पक्षनेते एकनाथ खडसे यांचे पुत्र निखिल खडसे यांचा पराभव करत एका अपक्ष उमेदवाराने मैदान मारलं होतं.

एकनाथ खडसे यांनी आपले सुपुत्र निखिल खडसे यांना भाजपकडून रिंगणात उतरवले होते. मुलाला निवडून आणण्यासाठी खडसेंनी पूर्ण मोर्चेबांधणी केली होती. खडसे परिवारासाठी ही अत्यंत प्रतिष्ठेची निवडणूक होती. जळगाव जिल्ह्यात खडसे यांचे मजबूत राजकीय वर्चस्व असल्याने निखिल खडसे यांचा विजय जवळपास निश्चित मानला जात होता. भाजप-शिवसेना युतीची ताकद आणि स्थानिक स्वराज्य संस्थांमधील संख्याबळ पाहता त्यांच्या विजयाबाबत फारशी शंका नव्हती.

मात्र, निवडणुकीच्या निकालाने सर्व राजकीय गणिते उलटी ठरली. अपक्ष उमेदवार मनीष जैन यांनी २४३ मते मिळवत निखिल खडसे यांचा १५ मतांनी पराभव केला. या निकालाने राजकीय वर्तुळात मोठी खळबळ उडाली होती. राज्याचे विरोधी पक्षनेते असलेल्या एकनाथ खडसेंना त्यांच्याच बालेकिल्ल्यात स्वतःच्या मुलाला निवडून आणता आले नाही, हा भाजप आणि खडसे यांच्यासाठी खूप मोठा राजकीय धक्का होता.

या निवडणुकीत मुख्य लढत त्रिकोणी झाली होती. निखिल एकनाथ खडसे हे भाजप-शिवसेना युतीचे अधिकृत उमेदवार होते. राष्ट्रवादीचे ज्येष्ठ नेते ईश्वरलाल जैन यांचे सुपुत्र मनीष जैन यांनी अपक्ष म्हणून निवडणूक लढवली होती. त्यांना सुरेशदादा जैन यांच्या गटाचा पूर्ण पाठिंबा होता. स्थानिक नेते अनिल छबीलदास चौधरी राष्ट्रवादी काँग्रेसचे उमेदवार होते.

सुरेशदादा जैन हे त्यावेळी शिवसेनेत होते. युतीचा धर्म म्हणून त्यांनी भाजपच्या निखिल खडसेंना मदत करणे अपेक्षित होते. मात्र, एकनाथ खडसेंशी असलेल्या टोकाच्या राजकीय वैरामुळे सुरेशदादा जैन यांनी पडद्याआडून शिवसेनेच्या नगरसेवकांचे मतदान भाजपला न मिळता अपक्ष मनीष जैन यांच्या पारड्यात कसे जातील, याची पूर्ण व्यवस्था केली होती.

या निवडणुकीत जळगाव जिल्ह्यातील नगरसेवक आणि जिल्हा परिषद सदस्यांना फुटण्यापासून रोखण्यासाठी 'रिसॉर्ट पॉलिटिक्स' खेळले गेले. मतदारांना थेट गोवा आणि नेपाळच्या सहलीवर पाठवण्यात आले होते. प्रत्येक मतासाठी कोट्यवधी रुपयांची उलाढाल झाल्याची चर्चा संपूर्ण महाराष्ट्रात गाजली. जळगावच्या इतिहासातील ही सर्वात महागडी निवडणूक मानली जाते.

निवडणुकीत अपक्ष उमेदवार मनीष जैन यांना २४३ मते मिळाली, तर निखिल खडसे यांना २२८ मते मिळाली. राष्ट्रवादी काँग्रेसचे अधिकृत उमेदवार अनिल चौधरी यांना ८१ मते मिळाली. त्यामुळे मनीष जैन यांनी १५ मतांनी विजय मिळवला. मुलाचा पराभव एकनाथ खडसे यांच्या जिव्हारी लागला होता.

पराभवानंतर एकनाथ खडसे यांनी शिवसेनेवर नाराजी व्यक्त केली. जळगावातील शिवसेनेचे प्रभावी नेते सुरेश जैन यांच्यावर अप्रत्यक्षपणे मनीष जैन यांना मदत केल्याचा आरोप करण्यात आला. युतीचा उमेदवार असतानाही अपेक्षित मते न मिळाल्याने क्रॉस व्होटिंग आणि अंतर्गत नाराजीच्या चर्चांना उधाण आले.

खडसे यांनी शिवसेनेला "विश्वासघातकी मित्र" असे संबोधत युतीधर्म पाळला गेला नसल्याची टीका केली. या निकालाचा भाजप-शिवसेना संबंधांवर दूरगामी परिणाम होऊ शकतो, असेही त्यांनी म्हटले होते. तेव्हापासून जैन आणि खडसेंमधील वाद विकोपाला पोहोचला.

या निवडणुकीमुळे भाजप-शिवसेना संबंधांमध्ये तणाव निर्माण झाल्याचे चित्र दिसून आले. स्थानिक राजकारणातील गटबाजी, युतीतील मतभेद आणि प्रभावशाली नेत्यांमधील संघर्ष यामुळे ही निवडणूक राज्यभर गाजली. आजही जळगावच्या राजकारणात २०१० च्या या निवडणुकीचा उल्लेख "राजकीय धक्का" आणि "बंडखोरीचा विजय" म्हणून केला जातो.